महानगरीय प्रहरी परिसर, ललितपुरका प्रमुख तथा प्रहरी वरिष्ठ उपरीक्षक (एसएसपी) टेकप्रसाद राईलाई धम्की दिने विप्लव समूहकी जिल्ला सेक्रेटरी पक्राउ परेकी छन्। 

प्रहरीले विप्लव समूहका ललितपुरकी सेक्रेटरी ३५ वर्षीया सविता अधिकारी (विदुषी)लाई शनिबार पक्राउ गरेको हो।  उनलाई ललितपुरको मंगलबजार क्षेत्रबाट पक्राउ गरेको एसएसपी राईले बताए। 

'उनले विज्ञप्ति जारी गर्दै धम्की दिएकी थिइन्। हामीले हिजो पाटन क्षेत्रबाट पक्राउ गर्यौं,'एसएसपी राईले भने।  अधिकारीले गत जेठ ३१ गते विज्ञप्ति जारी गरेकी थिइन्। 

उनले उक्त विज्ञप्तिमा एसएसपी टेकप्रसाद राईलाई प्रधानमन्त्री केपी शर्मा ओली सरकारका मतियार भन्दै नागरिकको बाँच्ने अधिकारको हनन नगर्न, चरित्र हत्या हुने खालका अभिव्यक्ति नदिन चेतावनी दिएकी थिइन्।  विप्लव समूहका श्याम बज्राचार्य पक्राउ परेपछि उनले उक्त अभिव्यक्ति दिएकी थिइन्।

ललितपुर प्रहरीले बज्राचार्यलाई विस्फोटक पदार्थसहित नियन्त्रणमा लिएको थियो। उनलाई प्रहरीले बंगलामुखी क्षेत्रबाट पक्राउ गरेको थियो।