(परासी) भारततर्फ चोरी निकासी गरिरहेको अवस्थामा पश्चिम नवलपरासी प्रहरीले ९ वटा मोटरसाइकलसहित ७ लाख बराबरको हरियो मटर बरामद गरेको छ । जिल्लाको प्रतापपुर र  सरावल गाउँपालिकाको नाकाबाट भारततर्फ लैजाँदै गरेको अवस्थामा मटर बरामद भएको जिल्ला प्रहरी कार्यालयका प्रवक्ता नायब उपरीक्षक राजु लामाले जानकारी दिए ।

केराउसँगै बरामद भएका मोटरसाइकलमा एक नेपाली र अन्य भारतीय थिए  । मोटरसाइकल बरामद भएपनि संलग्न व्यक्ति भने प्रहरीलाई देख्ने बित्तिकै फरार भएको नायब उपरीक्षक लामाले बताए । 

बरामद भएका केराउसहित मोटरसाइकल महेशपुर भन्सारमा बुझाइएको छ। पछिल्लो पटक जिल्लाका सीमावर्ती नाकाबाट हरियो मटरको चोरी निकासी बढेपछि जिल्ला सुरक्षा समितिले कोभिड–१९ को कारण देखाउँदै मटर ओसारपसार र ढुवानीमा प्रतिबन्ध लगाएको छ । 

प्रहरीले डेढ महिनाको अवधिमा बरामद गरेर बुझाएका केराउमध्ये ५० लाख बढीको लिलाम भइसकेको महेशपुर भन्सार कार्यालयले जनाएको छ ।