विश्वमा कोरोनाका थप संक्रमितको संख्यामा नयाँ रेकर्ड कायम भएको छ। २४ घण्टामा मात्रै विश्वभर दुई लाख १२ हजार तीन सय २६ संक्रमित थपिएका छन्।

विश्व स्वास्थ्य संगठनका अनुसार २४ घण्टामा थपिएको यो संख्या अहिलेसम्मकै बढी हो। सबैभन्दा बढी संक्रमित देखिएका राष्ट्रमा क्रमशः अमेरिका, ब्राजिल र भारत हुन्।

यसअघि २४ घण्टामा सबैभन्दा बढी संक्रमित जुन २८ मा देखिएको थियो। सो दिन एक लाख ८९ हजार ७७ जनामा संक्रमण देखिएको थियो। मृत्यु भने औसतमा दैनिक पाँच हजारको दरले भइरहेको छ। विश्वभर संक्रमितको संख्या १ करोड १२ लाख नाघेको छ। जसमध्ये ६० लाख ४० हजार निको भएका छन्। भारतमा मात्रै गएको २४ घण्टामा झण्डै २५ हजार संक्रमित थपिएका छन्। त्यस्तै ६ सय १३ जनाले ज्यान समेत गुमाएका छन्।

भारतको स्वास्थ्य मन्त्रालयले आइतबार दिएको जानकारी अनुसार पछिल्लो २४ घण्टामा २४ हजार ८ सय ५० संक्रमित थपिएको हो। जुन अहिलेसम्म एकै दिनमा देखिएको सबैभन्दा बढी संक्रमित संख्या हो। आइतबारसम्म भारतमा संक्रमितको संख्या ६ लाख ७३ हजार एक सय ६५ पुगेको छ भने ज्यान गुमाउनेको संख्या १९ हजार दुई सय ६८ पुगेको छ।

भारतमा सबैभन्दा बढी संक्रमित रहेको प्रदेश महाराष्ट्र हो। झण्डै २५ हजारले संक्रमित थपिएपछि महाराष्ट्रमा संक्रमितको संख्या पनि दुई लाख पुगेको हो।