(काठमाडौं) ब्राजिलमा कोरोना भाइरस संक्रमणका कारण मृत्यु हुनेको संख्या ५० हजार नाघेको छ । कोरोनाबाट सबैभन्दा धेरै मृत्यु हुने देशहरुको सूचीमा अमेरिकापछि ब्राजिल दोस्रो स्थानमा छ ।

जोन्स हप्किन्स विश्वविद्यालयको तथ्यांकअनुसार ब्राजिलमा कोरोना भाइरसका कारण ५० हजार ५ सय ९१ जनाको मृत्यु भएको छ । कोरोना संक्रमितको संख्या १० लाख ८३ हजारभन्दा बढी छ । विशेषज्ञहरुले भने परीक्षण कम भएकाले ब्राजिलमा अझै धेरै संक्रमित हुन सक्ने बताएका छन् ।

यसैबीच ब्राजिलका राष्ट्रपति जेयर बोल्सोनारोविरुद्ध सडकमा विरोध प्रदर्शन भएको छ । विरोधीहरु सडकमा उत्रिएपछि राष्ट्रपति बोल्सोनारोका समर्थकहरु पनि प्रदर्शनमा उत्रिएका छन् । सरकार विरोधी प्रदर्शनकारीहरुले राष्ट्रपति बोल्सोनारोलाई कोरोना रोकथाममा असफल भएको अभियोग चलाउन आह्वान गर्दै आएका छन् ।