(बुटवल) प्रदेश ५ का एक जना प्रदेशसभास सदस्यले विवाह गर्ने उमेर १८ वर्ष कायम गर्न माग गरेका छन् ।

मंगलबार बसेको प्रदेशसभा बैठकको विशेष समयमा बोल्दै समाजवादी पार्टीका सांसद विजयबहादुर यादवले किशोरीको विवाह गर्ने उमेर १८ वर्ष कायम गर्नुपर्ने माग गरेका हुन् ।

विद्यमान कानूनमा विवाह गर्ने उमेर २० वर्ष तोकिँदा विशेष गरी मधेशी र मुस्लिम समुदायमा यौनजन्य विकृति र अपराध बढेको उनको दाबी छ । राज्यले १६ वर्षमा नागरिकता दिने, १८ वर्ष पुगेकालाई मतदान गर्न दिने अनि विवाह गर्ने उमेर २० वर्ष तोक्नु अवैज्ञानिक र अव्यवहारिक भएको उनको तर्क छ ।

प्रहरी प्रशासनले तराईका जिल्लाहरुमा बालविवाहको आरोपमा मधेशी र मुस्लिम समुदायमाथि धरपकड र दुःख दिने काम गरेको भन्दै उनले कानून संशोधन गरी विवाह गर्ने उमेर १८ वर्ष बनाउनुपर्ने माग गरे ।