(काठमाडौं) आफ्नै महिला अनुयायीलाई जबरजस्ती करणी गरेको आरोप लागेका सुनसरी चतराधामका धर्मगुरु कृष्णदास महाराज भनिने कृष्णदास गिरीले आफूबाट गल्ती भएको स्वीकार गरेको अडियो प्राप्त भएको छ ।

काठमाडौंबाट चतराधाम पुगेकी एक महिला अनुयायीलाई गत कात्तिक ४ गते जबरजस्ती करणी गरेको भन्दै पीडित महिलाले सुनसरी जिल्ला प्रहरी कार्यालयमा उजुरी दर्ता गराएकी थिइन् ।

उजुरी दर्ता भएपछि कृष्णदासले महिलालाई गरेको फोन रेर्कडमा पटक-पटक आँफूबाट गल्ती भएकाले क्षमा माग्दै कारवाही रोक्न आग्रह गरिरहेको छन् । पीडित महिलाको उजुरीपछि कृष्णदास बिरामी भएको भन्दै विराटनगरको विराट नर्सिङ होममा भर्ना भएका छन् । स्रोतका अनुसार प्रहरीले शुक्रबार नै जिल्ला अदालतबाट सुनसरीबाट पक्राउपूर्जी लिएपनि अहिलेसम्म नियन्त्रणमा लिन सकेको छैन । कृष्णदासका अनुयायीले सामाजिक सञ्जालमा कृष्णदास र महिलाबीच म्यासेजमा भएको कुराकानी सार्वजनिक गरेका छन् ।

उजुरीदर्ता हुनु पहिले महिलाले कृष्णदासलाई पटक–पटक भेट्ने, चुम्बन गर्ने, अंकमाल गर्ने इच्छा व्यक्त गर्दै ४४ दिनभित्र भगवान र भक्तको वारपार हुने लगाएतका लामो म्यासेज पठाएकी छिन् ।

यस्तो म्यासेज पठाउने र जबरजस्ती करणीको आरोप लगाउने महिलालाई हामीले शनिबार भेटाएका छौं । उनले कृष्णदासले आँफूमा भगवान कृष्णप्रति भक्तिभाव जगाई ‘भगवान आँफै हुँ’ भन्ने बनाएपछि त्यस्तो म्यासेज लेखेको दाबी गर्छिन् । पीडित महिलाले कृष्णदासलाई पूर्ण रुपमा भगवान मानेकाले दशैंमा टीका लगाउन गएको समयमा एक्लै भेटघाट गरी आफूलाई जबरजस्ती करणी गरेता पनि डर क्रासका कारण तत्कालै सार्वजनिक रुपमा विरोध गर्न नसकेको बताउँछिन् ।

महिलाले लगाएकी सबै आरोपलाई कृष्णदास आँफैले स्वीकार गरेका छन् । कृष्णदास र महिलाबीच भएको डेढ घण्टा लामो फोन संवादमा कृष्णदासले पटक–पटक आँफूबाट धेरै गल्ती भएको बताएका छन् ।

उनले हरेक प्रकारबाट आफू गलत भएको, महान दोषी भएको स्वीकार गरेका छन् । यति मात्रै होइन उनले–‘अहिले तिम्रो हातमा छ । तर, २४ घण्टापछि तिम्रो हातमा पनि हुँदैन । मेरो अपराधलाई क्षमा गर’ भनेका छन् ।

हामीलाई प्राप्त भएको अडियोमा उनले अन्य धेरै कुराको पनि खुलासा गरेका छन् । कृष्णदासले गल्ती स्वीकार गर्दा पनि प्रहरीले उनलाई नियन्त्रणमा लिन सकेको छैन ।