उदयपुर कारागारमा क्षमताभन्दा झन्डै चार गुणा बढी कैदीबन्दी राखिँदा उनीहरूको दैनिक जीवन कष्टकर बनेको छ।

६० जनाको क्षमता रहेको जीर्ण कारागारमा हाल २३२ जना कैदीबन्दी राखिएका छन्। जसमा २१८ पुरुष र १४ महिला छन्। अत्यधिक चापका कारण खाने, बस्ने, सुत्ने र शौचालय प्रयोग गर्नसमेत समस्या भइरहेको कारागार प्रशासनले जनाएको छ।

चार दशक पुरानो भवनका भित्ता र पर्खाल कमजोर हुनुका साथै वर्षायाममा छाना चुहिने समस्या छ। नयाँ भवन निर्माणको योजना एक दशकअघि नै स्वीकृत भए पनि बजेट अभाव र अन्य कारणले निर्माण अघि बढ्न सकेको थिएन।

चालु आर्थिक वर्षमा सरकारले निर्माणका लागि स्रोत सुनिश्चित गरे पनि ठेक्का प्रक्रिया सुरु हुन सकेको छैन। प्रशासनले कैदीबन्दीको सुरक्षा र सहजताका लागि नयाँ भवन निर्माण तत्काल अघि बढाउनुपर्ने आवश्यकता औँल्याएको छ।