कोलम्बियामा विगत केही वर्षयताकै शक्तिशाली ७.४ म्याग्निच्युडको भूकम्प जाँदा कम्तीमा १३२ जनाको मृत्यु भएको छ। भूकम्पपछि सरकारले प्रभावित क्षेत्रमा संकटकाल घोषणा गर्दै उद्धार तथा राहत कार्यलाई तीव्रता दिएको छ।

कोलम्बियाको भौगर्भिक सेवाका अनुसार छोको प्रान्तलाई केन्द्रविन्दु बनाएर १०३ किलोमिटर गहिराइमा भूकम्प गएको हो। भूकम्पको धक्का देशको पश्चिमी भूभागका सयौँ माइलसम्म महसुस गरिएको थियो।

भूकम्पका कारण विभिन्न स्थानमा भवन तथा संरचनामा ठूलो क्षति पुगेको छ। भत्किएका भवनका भग्नावशेषमा मानिसहरू फसेको आशंका गरिएकाले मृतकको संख्या अझै बढ्न सक्ने अधिकारीहरूले बताएका छन्। दुर्घटनामा परी ४८० भन्दा बढी मानिस घाइते भएका छन्।

सबैभन्दा बढी क्षति ‘कफी क्षेत्र’ भनेर चिनिने पेरेइरा शहर र आसपासका क्षेत्रमा भएको जनाइएको छ। भूकम्पको केन्द्रविन्दु नजिक रहेको सान जोसे डेल पाल्मारमा भने सडक तथा अन्य पूर्वाधारमा क्षति पुगे पनि मानवीय क्षति नभएको स्थानीय प्रशासनले जनाएको छ।

भूकम्पपछि प्रभावित क्षेत्रमा उद्धार टोली परिचालन गरिएको छ। भग्नावशेषमा फसेका मानिसको खोजी तथा घाइतेको उपचारलाई प्राथमिकता दिँदै राहत सामग्री र आवश्यक सहयोग प्रभावित क्षेत्रमा पुर्‍याउने काम भइरहेको छ। क्षतिको पूर्ण विवरण संकलन गर्ने क्रमसमेत जारी रहेको अधिकारीहरूले बताएका छन्।