बेइजिङ — टाइफुन ‘डल्फिन’ पूर्वी चीनतर्फ अघि बढेपछि साङ्घाईका दुई प्रमुख विमानस्थलले आइतबार १ हजार ३०० भन्दा बढी उडान रद्द गरेका छन्।

आँधीको जोखिमलाई ध्यानमा राख्दै अधिकारीहरूले प्रभावित क्षेत्रबाट ४ लाखभन्दा बढी मानिसलाई सुरक्षित स्थानमा स्थानान्तरण गरेका छन्। साङ्घाईका होङकियाओ र पुडोङ विमानस्थलले आइतबारका लागि निर्धारित करिब ६० प्रतिशत उडान रद्द गरेका हुन्।

आँधीको बाहिरी घेराले शनिबार ताइवानको उत्तरी क्षेत्रमा भारी वर्षा गराएको थियो। ताइवानका केही वायुसेवा कम्पनीले समेत चीनतर्फका उडान रद्द गरेका छन्।

आइतबार बिहान टाइफुनको अधिकतम निरन्तर हावाको गति प्रतिघण्टा करिब १६२ किलोमिटर रहेको अनुमान गरिएको छ। भारी वर्षाका कारण बाढी र पहिरोको जोखिम बढेको अधिकारीहरूले बताएका छन्।

टाइफुन आइतबार अबेर झेजियाङ तथा छिमेकी फुजियान प्रान्तको उत्तरी क्षेत्रमा पुग्ने अनुमान गरिएको छ। मौसमविद्हरूले आगामी केही दिनमा ती क्षेत्रमा २०० देखि ४०० मिलिमिटरसम्म वर्षा हुन सक्ने चेतावनी दिएका छन्।

झेजियाङको ताइझोउ सहरबाट शनिबार साँझसम्म करिब ३ लाख ९० हजार मानिसलाई सुरक्षित स्थानमा सारिएको थियो भने साङ्घाईका जोखिमयुक्त क्षेत्रबाट ३० हजारभन्दा बढी मानिसलाई स्थानान्तरण गरिएको छ।

झेजियाङका अधिकारीहरूले फेरी, क्रुजलगायत जलयातायातका सबै गतिविधि स्थगित गर्दै सम्भावित बाढी तथा पहिरोबाट जोगिन उच्च सतर्कता अपनाउन आग्रह गरेका छन्।