लन्डन — बेलायतका नवनियुक्त प्रधानमन्त्री एन्डी बर्नह्यामले पदभार सम्हालेको एक सातापछि पहिलो विदेशी अतिथिका रूपमा युक्रेनी राष्ट्रपति भोलोदिमिर जेलेन्स्कीलाई सोमबार लन्डनमा स्वागत गर्ने भएका छन्।

भ्रमणका क्रममा प्रधानमन्त्री बर्नह्याम र राष्ट्रपति जेलेन्स्कीले बेलायती नौसैनिक अड्डाको संयुक्त भ्रमण गर्ने तथा बेलायतमा तालिम लिइरहेका युक्रेनी सैनिक र उनीहरूलाई प्रशिक्षण दिइरहेका सैन्य अधिकारीसँग भेट गर्ने कार्यक्रम रहेको छ।

डाउनिङ स्ट्रिटका अनुसार बर्नह्यामले युक्रेनप्रति बेलायतको समर्थन निरन्तर रहने प्रतिबद्धता दोहोर्‍याउँदै दीर्घकालीन र न्यायपूर्ण शान्ति स्थापना नभएसम्म सहयोग जारी रहने बताएका छन्।

भ्रमणका क्रममा बेलायतले ‘स्टोन क्लोक’ नामक युद्ध परीक्षण गरिएको इलेक्ट्रोनिक जामिङ प्रविधिको बौद्धिक सम्पत्ति युक्रेनसँग साझेदारी गर्ने तयारी गरेको छ। ड्रोनमा जडान गर्न सकिने यो प्रविधिले रूसी हवाई प्रतिरक्षा प्रणालीलाई चुनौती दिने क्षमता राख्ने बताइएको छ।

बेलायतले रुसको आक्रमण सुरु भएयता युक्रेनलाई करिब २५ अर्ब पाउण्ड बराबरको सहयोग उपलब्ध गराएको जनाएको छ। त्यसमा १६ अर्ब पाउण्ड प्रत्यक्ष सैन्य सहयोग रहेको बताइएको छ।

लन्डन भ्रमणपछि राष्ट्रपति जेलेन्स्की मंगलबार अमेरिका जाने कार्यक्रम छ। उनले अमेरिकी राष्ट्रपति डोनाल्ड ट्रम्पसँग भेटवार्ता गर्ने तथा युक्रेन समर्थक अमेरिकी सिनेटर लिन्डसे ग्राहमको अन्त्येष्टिमा सहभागी हुने अपेक्षा गरिएको छ।