गुल्मी, २२ जेठ — इस्मा गाउँपालिकाकी उपाध्यक्ष पार्वती कुँवरमाथि आक्रमण प्रयास भएको घटनामा संलग्नलाई कारबाहीको माग गर्दै गुल्मीमा विभिन्न महिला संगठनहरूले प्रदर्शन गरेका छन्।

पार्वती कुँवर सहित अन्य कर्मचारीमाथि भएको आक्रमण प्रयासमा संलग्नलाई तत्काल पक्राउ गरी कानुनी कारबाही गर्न माग गर्दै शुक्रबार जिल्लास्थित प्रशासन र प्रहरी कार्यालय अगाडि प्रदर्शन गरिएको हो।

प्रदर्शनमा अखिल नेपाल महिला संघ, अखिल नेपाल महिला संघ (क्रान्तिकारी), नेपाल महिला संघ लगायत विभिन्न महिला संगठनमा आबद्ध प्रतिनिधिहरू सहभागी भएका थिए।

प्रदर्शनकारीहरूले दोषीलाई तत्काल पक्राउ गरी कानुनी दायरामा ल्याउन, पीडितलाई न्याय दिन तथा महिला जनप्रतिनिधि र कर्मचारीको सुरक्षा सुनिश्चित गर्न माग गरेका छन्।

गत जेठ ८ गते मालिका गाउँपालिका–८ कुटी सिमलटारीमा आयोजित एक सत्संग कार्यक्रममा सहभागी हुन गएकी उपाध्यक्ष कुँवरसहित केही कर्मचारीमाथि योजनाबद्ध रूपमा आक्रमण प्रयास भएको आरोप लगाइएको छ।

प्रदर्शनपछि महिला संगठनका प्रतिनिधिहरूले जिल्ला प्रशासन कार्यालय र जिल्ला प्रहरी कार्यालयमा ज्ञापनपत्रसमेत बुझाएका छन्।