काभ्रे — बाढीका कारण अवरुद्ध बनेको बीपी राजमार्ग आजदेखि पुनः सञ्चालनमा आएको छ। अस्थायी डाइभर्सन निर्माण गरेपछि आज बिहानदेखि उक्त मार्गमा सवारी आवागमन सुचारु गरिएको हो।

गत बाढीले सडकका विभिन्न स्थानमा क्षति पुर्‍याएपछि यातायात पूर्ण रूपमा रोकिएको थियो। लगातार तीन दिनको मर्मतपछि अस्थायी रूपमा यातायात सञ्चालन गर्न सकिने अवस्था बनेको सडक विभागले जनाएको छ।

यससँगै पूर्वी तराई र काठमाडौँ जोड्ने प्रमुख मार्गमध्ये एक मानिने बीपी राजमार्ग मा आंशिक रूपमा यातायात सुचारु हुँदा यात्रु र मालवाहक सवारी साधनलाई केही राहत मिलेको छ।

यद्यपि जोखिमयुक्त क्षेत्र भएकाले सावधानी अपनाएर मात्र यात्रा गर्न आग्रह गरिएको छ। सडकको स्थायी मर्मत कार्य भने अझै जारी रहने बताइएको छ।