बेमौसमी वर्षाका कारण रोशी खोलामा आएको बाढीले बीपी राजमार्गमा बारम्बार अवरोध सिर्जना भएपछि सुरक्षा निकायले अवस्था बुझेर मात्र यात्रा गर्न सर्वसाधारणलाई आग्रह गरेको छ। जिल्ला सुरक्षा समितिले मंगलबारदेखि रातिको समयमा राजमार्गमा अनिश्चितकालीन आवागमन बन्द गरेको हो।

समितिको निर्णयअनुसार साँझ ५ बजेदेखि बिहान ५ बजेसम्म उक्त सडकखण्डमा सवारी सञ्चालन पूर्ण रूपमा रोकिएको छ। प्रहरी नायब उपरीक्षक रविन विष्टका अनुसार लगातारको वर्षाका कारण रोशी खोलाको सतह बढेर अस्थायी डाइभर्सन बगाउन थालेपछि यो निर्णय गरिएको हो। मौसमी अवस्था सुधार भएपछि मात्र आवागमन पुनः सञ्चालन गरिने उनले जानकारी दिए।

सोमबारको वर्षापछि रोशी गाउँपालिका–७ स्थित लास्कोट र घुमाउनेबीच सडकमा फसेका यात्रुको नेपाली सेना, नेपाल प्रहरी र सशस्त्र प्रहरीको संयुक्त टोलीले राति उद्धार गरेको थियो। पाँच माइक्रोबसमा रहेका ८९ यात्रुलाई राति १ बजे सुरक्षित रूपमा उद्धार गरी गन्तव्यतर्फ पठाइएको प्रहरीले जनाएको छ।

यसअघि वर्षाका कारण राजमार्ग बन्द भएपछि धुलिखेल, काभ्रेभन्ज्याङ, मङ्गलटार र सिन्धुलीको नेपालथोक क्षेत्रमा सवारी साधनलाई रोकिएको थियो। रोशी खोलामा आएको बाढीले अस्थायी डाइभर्सन पटक–पटक बगाउँदा बीपी राजमार्ग बारम्बार अवरुद्ध हुँदै आएको छ।

गत वर्षको बाढीपहिरोले काभ्रेपलाञ्चोकको चौकीडाँडादेखि सिन्धुलीको नेपालथोकसम्म करिब १८ किलोमिटर सडक क्षति पुर्‍याएको थियो। त्यसपछि खोलामै अस्थायी डाइभर्सन बनाएर यातायात सञ्चालन हुँदै आएकोमा अहिले स्थायी सडक निर्माण कार्य भइरहेको डिभिजन सडक कार्यालय भक्तपुरले जनाएको छ।

सुरक्षा निकायले यात्रुहरूलाई अनिवार्य रूपमा सडकको अवस्था बुझेर मात्र यात्रा गर्न र अर्को सूचना नआएसम्म जोखिमयुक्त खण्ड प्रयोग नगर्न आग्रह गरेको छ।