बागलुङको जैमिनी नगरपालिका–३ वडा कार्यालयले आफ्नै भवन निर्माण सम्पन्न गरेको छ। हालसम्म जीर्ण सामुदायिक वन उपभोक्ता समितिको भवनबाट सेवा प्रवाह गर्दै आएको वडा कार्यालय अब नयाँ भवनबाट सेवा सञ्चालन गर्ने तयारीमा छ।

करिब एक करोड रुपैयाँ लागतमा तीन कोठे भवन निर्माण गरिएको हो। लामो समयदेखि असुविधाजनक अवस्थामा सेवा दिँदै आएको वडा कार्यालय अब नयाँ संरचनामा स्थानान्तरण हुने भएको हो।

स्थानीय कृष्णबहादुर छन्त्याल, चन्द्रबहादुर पाण्डे, इन्द्रकली पुन र मोहन पुनको परिवारले रु १० लाख बराबरको १० रोपनी जग्गा निःशुल्क उपलब्ध गराएपछि भवन निर्माण सम्भव भएको वडा अध्यक्ष कृष्णबहादुर भुजेलले जानकारी दिए।

उनका अनुसार, “हालसम्म आफ्नै भवन नहुँदा निकै कठिनाइ भोग्नु पर्‍यो, अब यही वैशाख २३ गतेदेखि नयाँ भवनबाट सेवा सुरु गर्ने तयारी छ।”

नगरपालिकाका उपप्रमुख हरिहर शर्माले सबै वडा कार्यालयलाई व्यवस्थित बनाउँदै सेवा प्रवाहलाई अझ प्रभावकारी बनाइने बताएका छन्। नगरका अधिकांश वडाका भवनहरू अहिले निर्माणाधीन अवस्थामा रहेका छन्।