अर्थमन्त्री डा.स्वर्णिम वाग्ले र नेपालका लागि जनवादी गणतन्त्र चीनका राजदूत महामहिम झाङ माओमिङबिच शिष्टाचार भेटवार्ता भएको छ ।

अर्थ मन्त्रालयमा भएको उक्त भेटवार्तामा दुई देशबिचको आर्थिक तथा कूटनैतिक सम्बन्धका विविध आयामका बारेमा छलफल भएको चिनियाँ राजदूत झाङ माओमिङले जनाएका छन् । 

अर्थमन्त्री र राजदूतबिच भएको भेटमा बैङ्किङ क्षेत्र, कनेक्टिभिटी (सञ्जाल विस्तार), पर्यटन र पछिल्लो समय विकसित आर्टिफिसियल इन्टेलिजेन्सका क्षेत्रमा द्विपक्षीय सहयोग बढाउने विषयमा छलफल भएको थियो । 

दुवै पक्षले नेपाल र चीनबिचको कनेक्टिभिटीलाई अझ सुदृढ बनाउने र द्विपक्षीय सम्बन्धलाई व्यावहारिक, कुशल र दिगो विकासको बाटोमा अगाडि बढाउने साझा प्रतिबद्धता भएको छ । 

राजदूत माओमिङले सामाजिक सञ्जालमार्फत भेटघाट निकै फलदायी रहेको बताउँदै भनेका छन्, ‘हामीले बैङ्किङ, कनेक्टिभिटी, पर्यटन र आर्टिफिसियल इन्टेलिजेन्स जस्ता क्षेत्रमा सहकार्य गर्ने विषयमा अर्थपूर्ण छलफल गर्‍यौँ। नेपाल–चीन सम्बन्धलाई थप व्यावहारिक र दिगो बनाउन हामी प्रतिबद्ध छौँ।’

भेटले आगामी दिनमा नेपालको डिजिटल पूर्वाधार र आर्थिक विकासमा चिनियाँ सहयोग र लगानीलाई थप वृद्धि गर्ने अपेक्षा गरिएको छ ।