लेनिनको आदर्शलाई आत्मसाथ गर्दै सल्यानमा स्थापना दिवस मनाइयो: भ्रष्टाचारीलाई कारबाही र जनजीविकाको मुद्दा प्राथमिकतामा
सल्यान: क्रान्तिकारी कम्युनिष्ट पार्टी सल्यान जिल्ला समितिको आयोजनामा शारदा नगरपालिका-१ श्रीनगरमा लेनिन दिवस तथा पार्टी स्थापना दिवस भव्य रूपमा सम्पन्न भएको छ।
क्रान्तिकारी कम्युनिष्ट पार्टी निकट क्रान्तिकारी मजदुर सङ्घ सल्यान जिल्ला संयोजक कृष्टलको अध्यक्षता, केन्द्रीय सदस्य मोतिराम खड्काको प्रमुख आतिथ्यता तथा हेमन्त वलीको सञ्चालनमा सम्पन्न उक्त कार्यक्रममा जिल्ला सेक्रेटरी उज्वल लगायत जिल्लाका नेता-कार्यकर्ताको उल्लेखनीय उपस्थिति रहेको थियो। कार्यक्रममा सहभागीहरूले विश्व सर्वहारा वर्गका नेता भ्लादिमिर लेनिनको योगदानको चर्चा गर्दै वर्तमान राजनीतिक परिस्थितिमा क्रान्तिकारी कम्युनिष्टहरूको भूमिकाबारे गहन छलफल गर्नुभएको थियो ।
कार्यक्रमलाई सम्बोधन गर्दै प्रमुख अतिथि मोतिराम खड्काले अप्रिल २२, १८७० मा जन्मिएका रुसी क्रान्तिका नायक लेनिनले मार्क्सवादी विचारधारालाई व्यवहारमा कार्यान्वयन गरेर विश्व कम्युनिष्ट आन्दोलनलाई नयाँ उचाई दिएको बताउनुभयो। खड्काका अनुसार लेनिनले संगठनमा आबद्ध रहने, लेवी तिर्ने र संगठनले सुम्पिएको जिम्मेवारी अनुशासनपूर्वक पूरा गर्ने पद्धति विकास गरेकाले नै सर्वहारा वर्गले राज्यसत्ता हात पार्न सम्भव भएको हो। मार्क्सले प्रतिपादन गरेको विचारलाई धर्तीमा उतार्ने सर्वोच्च नेता भएकाले नै आज संसारभरका मजदुर, किसान र सर्वहारा वर्गले लेनिनलाई आफ्नो धरोहर मान्दै जन्मजयन्ती मनाउने गरेको उहाँले प्रष्ट पार्नुभयो। सल्यानका अगुवा कार्यकर्ताले पनि तिनै ३ वटा सांगठनिक विधि अपनाएमा मात्र राज्यसत्ता क्रान्तिकारीहरूको हातमा आउने उहाँको दाबी थियो।
त्यसैगरी जिल्ला सेक्रेटरी हेमन्त वलीले लेनिनलाई विश्वकै सर्वोत्कृष्ट क्रान्तिकारी नेताका रूपमा स्मरण गर्दै उहाँले समाज परिवर्तनका लागि गरेको त्याग र तपस्यालाई पार्टीको सम्पूर्ण पङ्क्तिले आत्मसाथ गर्नुपर्नेमा जोड दिनुभयो। वलीले अब क्रान्तिकारी कम्युनिष्ट पार्टीले शासनसत्ता प्राप्तिका लागि सशस्त्र वा शान्तिपूर्ण जुनसुकै तवरबाट पनि संघर्ष अगाडि बढाउने उद्घोष गर्नुभयो। पार्टीभित्र युवा नेतृत्वलाई स्थापित गर्न पहल गरिने बताउँदै उहाँले सल्यान जिल्लामा जनजीविकासँग प्रत्यक्ष जोडिएका मुद्दाहरूमा पार्टीले अब सक्रिय अपनत्व लिने स्पष्ट पार्नुभयो।
आफ्नो मन्तव्यका क्रममा सेक्रेटरी वलीले जिल्लाभित्र हुने भ्रष्टाचारविरुद्ध पार्टी कडा रूपमा प्रस्तुत हुने र भ्रष्टहरूलाई जनस्तरबाटै कारबाही गर्ने चेतावनी समेत दिनुभयो। जनताका पिरमर्का र अधिकारका लागि उठ्ने आवाजलाई भ्रष्ट शासन वा प्रशासन वा कुनै पनि निकायले रोक्न नसक्ने भन्दै उहाँले आगामी दिनमा संगठन सुदृढीकरण र जनसंघर्षलाई थप सशक्त बनाइने बताउनुभयो।
कार्यक्रमका सहभागीहरूले पनि लेनिनको विचारलाई व्यवहारमा लागू गर्दै जनताको सेवामा समर्पित हुने प्रतिबद्धता व्यक्त गरेका थिए।
