पोखरामा गुडिरहेको बसमा आगलागी भएको छ । पोखरा २२ पुम्दीभुम्दी स्थित ठूलाडिही भन्ने ठाउँमा बसमा आगो लागेको हो । ग १ ख ९५६२ नम्बरको बसमा तार सर्ट भएर एक्कासी आगो लागेको प्रहरीले जनाएको छ ।

कास्की प्रहरीका प्रवक्ता डीएसपी हरीबहादुर बस्नेतका अनुसार बसमा सवार सबै यात्रुको सकुशल उद्धार गरिसकिएको छ । बाग्लुङबाट स्याङजा वालिङको लागि छुटेको बस पोखरा पुगेपछि आगो लागेको हो । 

बसमा आगोलागी भएको भन्ने खबर पाउने वित्तकै वडा प्रहरी कार्यालय बैदामबाट डीएसपी नमराज भट्टराईको कमाण्डमा १५ जनाको टोली खटिएको थियो । बसमा ४० जना यात्रु सेवार रहेको बताइएको छ । अहिले गाडीमा लागेको आगो पूर्ण रुपमा नियन्त्रणमा आइसकेको छ । तर गाडी जलेर ठूलो क्षति भएको बताइएको छ । घटनाबारे थप छानविन भइरहेको प्रहरीले जनाएको छ ।