छात्रवृत्तिको रकम हिनामिना गरेको आरोपमा प्रधानाध्यापकसहित तीन जनाविरुद्ध मुद्दा दायर
अख्तियार दुरुपयोग अनुसन्धान आयोगले जुम्लाको तातोपानी गाउँपालिकास्थित गणेश माध्यमिक विद्यालयका तीन जना पदाधिकारीमाथि छात्रवृत्ति रकम हिनामिना गरेको आरोपमा विशेष अदालत काठमाडौँमा सोमबार आरोपपत्र दायर गरेको छ ।
आर्थिक वर्ष २०७९/०८० को १ लाख ४५ हजार ३५० रुपैयाँ छात्रवृत्ति रकम विद्यार्थीहरूलाई वितरण नगरी प्रधानाध्यापक नरेन्द्र बहादुर महत, विद्यालय व्यवस्थापन समितिका अध्यक्ष तिल प्रसाद भट्टराई र लेखा सहायक कृष्ण कामीले मिलेमतोमा हिनामिना गरेको आयोगको अनुसन्धानले देखाएको छ ।
उनीहरूले नक्कली भरपाई तयार पारी मिति केरमेट गरी झुट्टा विवरण पेस गरेको र स्थलगत अनुसन्धानमा समेत विद्यार्थीले छात्रवृत्ति नपाएको पुष्टि भएको अख्तियारले जनाएको छ ।
आरोपितहरूमाथि भ्रष्टाचार निवारण ऐन २०५९ को दफा ८ को उपदफा (१) बमोजिम कसुर कायम गरी बिगो बमोजिम कैद र जरिवाना तथा बिगो असुलउपरको मागदाबी लिइएको अख्तियारका प्रवक्ता सुरेश न्यौपानेले जानकारी दिए।
