भक्तपुर प्रतिनिधि सभा निर्वाचन क्षेत्र नं. २ मा राष्ट्रिय स्वतन्त्र पार्टीका राजीव खत्री निर्वाचित हुँदा महेश बस्नेत र शोभा पाठक दुवै पराजित भएका छन् ।

खत्रीले ३४,७०२ मत प्राप्त गर्दै जित हासिल गरे। यस क्षेत्रमा नेपाल कम्युनिष्ट पार्टी (एकीकृत मार्क्सवादी लेनिनवादी) का उम्मेदवार बस्नेतले ८,३५१ मत प्राप्त गर्दै दोस्रो स्थानमा सीमित भए। यहा नेपाली कांग्रेसका कविर राणाले ७,३२१ मत पाएका छन्।

यहाँ महेश बस्नेतलाई बलात्कारसहितका विभिन्न आरोप लगाउँदै आएकी शोभा पाठकले केबल १९ भोट पाएकी छन्। नेपाल जनसेवा पार्टीकी उम्मेदवार जानुका पाठक (शोभा)ले १९ मत मात्रै पाएकी हुन् । धादिङकी उनी बस्नेतलाई कुनै हालतमा हराउने भन्दै भक्तपुर-२ पुगेकी थिइन् । बस्नेतविरूद्ध उनको प्रचारले रास्वपाको भोट बढाउन सहयोग गरेको अनुमान छ।

यहाँ नेपाल मजदुर किसान पार्टीका रमेश वैद्यले २,९४१ मत प्राप्त गरेका छन् । नेपाली कम्युनिष्ट पार्टीका रामप्रसाद सापकोटाले १,११४ मत पाएका छन्।

राष्ट्रिय प्रजातन्त्र पार्टीका विक्रम थापाले ९०१ मत, श्रम संस्कृति पार्टीका अर्जुन बासुले ५९३ मत र उज्यालो नेपाल पार्टीका जितराम लामाले ३३६ मत प्राप्त गरेका छन्।

स्वतन्त्र उम्मेदवार आनन्द कार्कीले १३७ मत पाउँदा नेपाल कम्युनिस्ट पार्टी (माओवादी) का प्रकाशराज ढुङ्गेलले ३८ मत र स्वतन्त्र उम्मेदवार साजन ढकालले ३३ मत प्राप्त गरेका छन्।