नेपाली कांग्रेस र नेकपा एमालेका नेताहरूले निर्वाचनको परिणामका विषयमा पार्टीभित्र गम्भीर समीक्षा हुने बताएका छन् । शुक्रबार काठमाडौँमा आयोजित कार्यक्रममा उनीहरूले प्रतिनिधिसभा निर्वाचनको परिणाम अनपेक्षित आएको भन्दै पार्टी भित्र गम्भीर समीक्षा हुने बताएका हुन् । निर्वाचनको परिणामलाई लिएर अहिले नै पार्टी नेतृत्वप्रति प्रश्न उठाउनु उचित नभएको उनीहरूको भनाइ छ ।

कार्यक्रममा नेपाली कांग्रेसकी नेतृ डा. डिला संग्रौलाले जनताले लिएको मतलाई पार्टीले स्वीकार गर्ने र निर्वाचनका विषयमा पार्टीभित्र गम्भीर छलफल हुने बताइन् । 

उनले निर्वाचनमा भएको पराजयको नैतिक जिम्मेवारी सभापति गगन थापाको केन्द्रीय समितिले लिने तर सभापतिको राजीनामा अहिलेको विकल्प नभएको उल्लेख गरिन् । संग्रौलाले अब बन्ने सरकारलाई पार्टीका तर्फबाट रचनात्मक सहयोग हुने धारणा राखिन् ।

त्यस्तै नेकपा एमालेका नेता शेर बहादुर तामाङले निर्वाचनको परिणामलाई लिएर नेतृत्वलाई मात्रै दोष दिएर कोही उम्कने ठाउँ नरहेको बताए । निर्वाचनका विषयमा पार्टीभित्र गम्भीर छलफल हुने र आगामी दिनमा बलियो शक्तिको रूपमा अघि बढाउन कमीकमजोरी सुधार गर्दै अघि बढ्ने उनले बताए । 

तामाङले जेनजी आन्दोलनमा भएका घटनाको जाँचबुझ आयोगको प्रतिवेदनप्रति छेडखानी गरिएको आशंका व्यक्त गर्दै प्रतिशोध साध्ने काम भएको भए स्वीकार्य नहुने बताए । उनले भ्रष्टाचारको सबै प्रकरणको छानबिन गर्नुपर्ने भन्दै एमालेका नेताहरू भ्रष्टाचार ठहरिए त्यस्ता नेताहरूलाई पार्टीले बोकेर नहिँड्ने स्पष्ट पारे ।