६ वर्ष कैद र २२ करोड भन्दा बढी जरिवाना तोकिएको फरार प्रतिवादी पक्राउ
प्रहरीको केन्द्रीय अनुसन्धान ब्युरो (सिआइबी)ले ६ वर्ष कैद र २२ करोड रुपैयाँ भन्दा बढी जरिवानापछि फरार प्रतिवादीलाई पक्राउ गरेको छ ।
नेपाल शेयर मार्केट्स एण्ड फाइनान्स लिमिटेडका तत्कालीन कार्यकारी अध्यक्ष योगेन्द्रप्रसाद श्रेष्ठलाई काठमाडौँको नागार्जुन–५ सितापाइलाबाट पक्राउ गरिएको हो ।
श्रेष्ठ नेपाल शेयर मार्केट्स एण्ड फाइनान्स लिमिटेडसँग सम्बद्ध रही अनियमित एवम् गैरकानूनी तवरले निक्षेपकर्ता र संस्थाको हित विपरीत हुने कार्य गरेको मुद्दामा दोषी कसुर भएका व्यक्ति हुन् ।
काठमाडौँ महानगरपालिका वडा नं. २४ वटु घर भई सितापाइला बस्दै आएका ६९ वर्षीय श्रेष्ठ सर्वोच्च अदालतबाट दुई वटा मुद्दामा दोषी करार भएका व्यक्ति हुन् ।
२०८१ भदौ ५ गते भएको फैसलामा उनले १९ करोड ४६ लाख १ हजार ६ सय ६२ रुपैयाँ तथा तीन वर्ष कैद र अर्को मुद्दामा ३ करोड २१ लाख ३९ हजार ६ सय ८१ रुपैयाँ जरिवाना र ३ वर्ष कैद भएको थियो ।
२२ करोड ६७ लाख ४१ हजार ३ सय ४३ रुपैयाँ जरिवाना र ६ वर्ष कैद सजाय ठहर भएपछि फरार श्रेष्ठलाई सिआइबीले नियन्त्रणमा लिएर काठमाडौं जिल्ला अदालतमा पेस गरेको प्रवक्ता वरिष्ठ प्रहरी उपरीक्षले शिवकुमार श्रेष्ठले जानकारी दिए ।
