फागुन २१ गते सम्पन्न प्रतिनिधि सभा निर्वाचनको मतपरिणाम आउने क्रम सुरू भएको छ। ८८ स्थानमा अहिले मतगणना भइरहेको छ। दुई क्षेत्रको अन्तिम परिणाम प्राप्त भएको छ। रास्वपा र नेपाली कांग्रेसले एक-एक क्षेत्र जितेका छन्।

जारी मतगणनामा नेपाली कम्युनिष्ट पार्टीका ३ उम्मेदवारले अग्रता लिएका छन्। रुकुम पूर्वमा पुष्पकमल दाहाल 'प्रचण्ड'ले अग्रता लिइरहेका छन्। प्रचण्ड नेपाली कम्युनिष्ट पार्टीका संयोजक हुन्।

प्रचण्डले ४ हजार ३ सय ९८ मत प्राप्त गर्दा कांग्रेसकी कुसुमदेवी थापाले १ हजार २ सय ६१ मत प्राप्त गरेकी छिन्। नेकपा एमालेका लिलामणी गौतमले ९ सय ७ र रास्वपाका लखनकुमार थापाले ३ सय ५४ मत प्राप्त गरेका छन्। 

कपिलवस्तु २ मा बृजेशकुमार गुप्ताले अग्रता लिएका छन्। गुप्ताले १ हजार ३ सय ९६ मतका साथ अग्रता लिएका छन्। रास्वपाका विक्रम थापाले ९ सय २३ मतका साथ पछ्याइरहेका छन्। नेपाली कांग्रेसका सुरेन्द्रराज आचार्यले ६ सय ९२ मत प्राप्त गरेका छन्। गुप्ता दुईपटक प्रतिनिधि सभा सदस्य भइरहेका छन्। त्यस्तै भौतिक योजना तथा निर्माण मन्त्री र कानून मन्त्रीका रुपमा काम गरिसकेका व्यक्ति हुन्। 

कालिकोट १ मा महेन्द्रबहादुर शाहीले अग्रता लिएका छन्। उनले ५ हजार ५१७ मत प्राप्त गरेका छन्। नेकपा एमालेका नगीन्द्र शाहीले ४ हजार १५० मतका साथ पछ्याइरहेका छन्। 

कांग्रेसका हर्षबहादुर बमले पनि ४ हजार २७ मतका साथ पछ्याइरहेका छन्। नेपाल कम्युनिष्ट पार्टीका खडगबहादुर विश्वकर्माले २ हजार ४७४ मत प्रप्त गरेका छन्। रास्वपाका प्रकाश न्यौपानेले १ हजार ३३ मत प्राप्त गरेका छन्।