नेकपा (एमाले) का अध्यक्ष केपी शर्मा ओली पक्राउ परेको विरोधमा सुदूरपश्चिम प्रदेशका विभिन्न जिल्लामा आइतबार पनि प्रदर्शन भएको छ । पार्टीको पूर्वनिर्धारित कार्यक्रमअनुसार कैलाली र कञ्चनपुरसहितका जिल्लाहरूमा एमाले कार्यकर्ताहरूले चर्को नाराबाजीसहित विरोध प्रदर्शन गरेका हुन् ।

अध्यक्ष ओलीको तत्काल रिहाइको माग गर्दै एमाले कार्यकर्ताहरूले आज जिल्ला प्रशासन कार्यालय अगाडि प्रदर्शन गरेका छन् । कैलालीको धनगढी र कञ्चनपुरको महेन्द्रनगरमा प्रदर्शनकारी र प्रहरीबिच केही बेर धकेलाधकेल समेत भएको छ ।

प्रदर्शनका क्रममा कार्यकर्ताहरूले सरकारविरुद्ध चर्का नारा लगाउँदै राजनीतिक प्रतिशोधका आधारमा अध्यक्षलाई पक्राउ गरिएको आरोप लगाएका छन् ।

पार्टीको पूर्वनिर्धारित कार्यक्रमअनुसार सुदूरपश्चिमका सबै जिल्ला प्रशासन कार्यालयमार्फत सरकारलाई ज्ञापनपत्र बुझाउने क्रम जारी रहेको एमाले सुदूरपश्चिम प्रदेश कमिटीले जनाएको छ । 

ज्ञापनपत्रमा अध्यक्ष ओलीलाई बिना सर्त रिहा नगरे आन्दोलनलाई थप सशक्त बनाउने चेतावनी दिइएको छ । अहिले सुदूरपश्चिमका मुख्य सहरहरूमा सुरक्षा व्यवस्था कडा पारिएको छ भने एमाले कार्यकर्ताहरूको विरोध प्रदर्शन जारी रहेको छ ।