नेकपा एमालेका २३ वटा जनसंगठनले अध्यक्ष केपी शर्मा ओली पक्राउको विरोधमा आज दिउँसो ३ बजे देशभर प्रदर्शन गर्ने भएका छन् ।

आज पार्टी केन्द्रीय कार्यालय च्यासलमा बसेको केन्द्रीय सचिवालय बैठकले पार्टी अध्यक्ष तथा पूर्वप्रधानमन्त्री ओलीको पक्राउविरुद्ध जनसंगठनको तर्फबाट विरोध प्रदर्शन गर्ने निर्णय गरेको थियो ।

जनसंगठनहरुको आजको प्रदर्शन सबै जिल्लाका सदरमुकाम केन्द्रित हुने बताइएको छ । यस्तै, एमालेले चैत १५ गते मध्याह्न १२ बजे जिल्ला पार्टी कमिटीको आयोजनामा व्यापक प्रदर्शन गर्दै प्रमुख जिल्ला अधिकारी (प्रजिअ) कार्यालयमा विरोधपत्र बुझाउने निर्णय गरेको छ ।

बालेन्द्र शाह नेतृत्वमा हिजो गठन भएको नयाँ सरकारले भदौमा भएको जेनजी आन्दोलन घटनामा पूर्वन्यायाधीश गौरीबहादुर कार्की नेतृत्वमा गठित छानबिन समिनिले बुझाएको प्रतिवेदन तत्काल कार्यान्वयन गर्ने निर्णय गरेको थियो ।

सरकारको उक्त निर्णय प्रति एमालेका २३ वटै जनसंगठनले हिजो नै विज्ञप्ति निकालेर अध्यक्ष ओलीलाई पक्राउ गरे प्रतिरोधमा उत्रने चेतावनी दिएका थिए ।

प्रहरीले ओलीलाई ज्यान सम्बन्धी कसूरमा अनुसन्धानका लागि आज बिहान उनकै निवास भक्तपुरको गुण्डुबाट पक्राउ गरेको थियो ।