ओलीको गिरफ्तारीविरुद्ध सुदूरपश्चिममा पनि एमालेको प्रदर्शन
नेकपा एमालेका अध्यक्ष केपी शर्मा ओलीलाई पक्राउ गरिएको विरोधमा सुदूरपश्चिम प्रदेशका विभिन्न जिल्लाहरूमा शनिबार विरोध प्रदर्शन भएको छ । एमालेका कार्यकर्ताहरूले अध्यक्ष ओलीको गिरफ्तारीलाई राजनीतिक प्रतिशोध भन्दै तत्काल रिहाइको माग राखेर सडकमा उत्रिएका हुन् ।
सुदूरपश्चिमको अस्थायी राजधानी धनगढीमा एमालेका कार्यकर्ताहरूले ठुलो सङ्ख्यामा भेला भई नाराबाजी गरेका छन् । धनगढीको मुख्य चोकमा भेला भएका प्रदर्शनकारीहरूले सरकारविरुद्ध चर्का नारा लगाउँदै अध्यक्ष ओलीलाई विना सर्त रिहा गर्न माग गरे ।
त्यसैगरी, कञ्चनपुरको महेन्द्रनगरमा पनि एमाले कार्यकर्ताहरूले विरोध र्याली निकालेका छन् । महेन्द्रनगरको मदन चोकमा आयोजित कोणसभालाई सम्बोधन गर्दै एमाले नेताहरूले सरकारले अधिनायकवादी शैली अपनाएको आरोप लगाए । उनीहरूले ओलीको रिहाइ नभएसम्म आन्दोलन नरोकिने चेतावनी समेत दिएका छन् । सुदूरपश्चिमका अन्य पहाडी जिल्लाहरू मा पनि एमाले कार्यकर्ताहरूले विरोध प्रदर्शन गरिरहेका छन् ।
