उपल्लो डोल्पाको शे फोक्शुण्डो गाउँपालिका फोतगाउँस्थित दुर्गम मतदान केन्द्रमा खटिएका पाँच जना निर्वाचन कर्मचारी बिरामी परेपछि हवाई उद्धार गरिएको छ । 

उच्च हिमाली क्षेत्रको चिसो मौसम र अक्सिजनको कमीका कारण कर्मचारीहरू अस्वस्थ भएपछि तत्काल उद्धार गर्नुपरेको प्रशासनले जनाएको छ । प्रशासनका अनुसार बिरामी परेकाहरूमा ज्वरो आउने, टाउको दुख्ने, खोकी लाग्ने, बान्ता हुने तथा श्वासप्रश्वासमा समस्या देखिएको थियो । स्वास्थ्य अवस्था जटिल बन्न सक्ने देखिएपछि नेपाली सेनको हेलिकप्टरमार्फत उनीहरूलाई उद्धार गरिएको हो ।

उद्धार गरिएकामध्ये जिल्ला अदालतका सहायक कर्मचारी गोर्खबहादुर थापा, साल्ट ट्रेडिङका धनबहादुर महतरा र तीन जना निर्वाचन प्रहरी रहेका छन् । उनीहरूलाई उपचारका लागि जिल्ला अस्पताल डोल्पा पठाइएको छ।

फोतगाउँ मतदान केन्द्र सदरमुकाम दुनैबाट करिब ६ दिन पैदल हिँड्नुपर्ने दुर्गम क्षेत्रमा पर्छ । तत्काल स्वास्थ्य सेवा उपलब्ध गराउन कठिनाइ भएपछि हवाई उद्धारको विकल्प रोज्नुपरेको हो । उक्त केन्द्रमा ४० जना मतदाता रहेका छन् ।

कर्मचारी बिरामी परेपछि त्यहाँ वैकल्पिक जनशक्ति व्यवस्थापन र मतदान प्रक्रिया प्रभावित नहुने गरी तयारी अघि बढाइएको प्रशासनले जनाएको छ ।