फागुन २१ गते हुने प्रतिनिधिसभा सदस्य निर्वाचन नजिकिँदै गर्दा नेकपा एमालेका अध्यक्ष केपी शर्मा ओली आज पनि झापाका मतदातासँगको भेटघाटलाई निरन्तरता दिने भएका छन् ।

उनले आज झापाको कमल गाउँपालिका अन्तर्गतका विभिन्न स्थानमा पुगेर मतदातासँग भेटघाट गर्ने कार्यक्रम रहेको छ ।

झापा निर्वाचन क्षेत्र नम्बर ५ को नेकपा एमाले निर्वाचन परिचालन समितिका संयोजक देवेन्द्र दाहालका अनुसार बिहीवार दिनभरी कमल गाउँपालिका अन्तर्गतका विभिन्न आठ स्थानमा पुगेर भेटघाट गर्ने कार्यक्रम तय भएको छ ।

आज बिहान ११ बजे कमल– ५ को सिम्लेस्थित सिरिजङ्गा चौकमा स्थानीयसँग भेटघाट गर्ने कार्यक्रम रहेको छ । त्यस्तै साढे १२ बजे सोही वडाको झारबारी स्थित राधाकृष्ण मन्दिरमा पुगेर स्थानीयसँग भेटघाट गर्ने छन् ।

यसैगरी, दिउँसो साढे १ बजे कमल– ३ सानो केर्खा, साढे २ बजे कमल– ४ को भलायोडाँडा, साढे ३ बजे कमल– २ को भुत्लुङमा अध्यक्ष अ‍ोलीले स्थानीयसँग प्रत्यक्ष भेटघाट गर्ने छन् ।

यस्तै, ओलीले सोही वडाको जीवन चौकमा अपराह्न ४ बजे, साढे ४ बजे कमल– ४ र ६ मा पर्ने नयाँ बस्ती, साँझ ५ बजे कमल– ५ को रत्नपुर टोल मंलगबारेमा पुगेर मतदातासँग भेटघाट गरेपछि आजको कार्यक्रम सकिने एमालेले जनाएको छ । ओलीले हिजो (बुधबार) गौरीगञ्ज गाउँपालिकाको ११ स्थानमा पुगेर मतदाता तथा स्थानीयसँग भेटघाट गरेका थिए ।