संरक्षित वन्यजन्तु जीवित कछुवाको अवैध खरिद बिक्रीमा संलग्न रहेको आरोपमा ललितपुरमा एक युवक पक्राउ परेका छन्। केन्द्रीय अनुसन्धान ब्यूरो (सीआईबी) को टोलीले चितवन भरतपुर महानगरपालिका-१६ घर भई हाल ललितपुरको धोबीघाट बस्ने १९ वर्षीय रोहिम तिवारीलाई आइतबार नियन्त्रणमा लिएको हो।

विशेष सूचनाको आधारमा खटिएको ब्यूरोको टोलीले धोबीघाट क्षेत्रमा खानतलासी गर्दा तिवारीको साथबाट ६ वटा जीवित कछुवा बरामद गरेको छ। अवैध रूपमा कछुवा ओसारपसार गरी खरिद बिक्री गर्नका लागि बोकी हिँडिरहेको अवस्थामा उनलाई प्रहरीले फेला पारेको थियो।

पक्राउ परेका तिवारी र बरामद गरिएका कछुवाहरूलाई थप अनुसन्धान तथा कानुनी कारबाहीका लागि डिभिजन वन कार्यालय गोदावरी, ललितपुरमा बुझाइएको छ। नेपालको कानुनले कछुवालाई संरक्षित वन्यजन्तुको सूचीमा राखेको छ र यसको ओसारपसार वा खरिद बिक्री गर्नु गैरकानुनी मानिन्छ।