क्रान्तिकारी कम्युनिष्ट पार्टीले सल्यान र रुकुममा सुरु गरेको निर्वाचन बहिष्कार अभियान आज दोस्रो दिन थप तीव्र बनाएको छ। अभियान अन्तर्गत आज पश्चिम रुकुमको मुसिकोट (झुलनेटा) र पूर्वी रुकुमको रुकुमकोटमा भव्य 'भण्डाफोर कोणसभा' सम्पन्न भएका छन्।

पार्टीको ४ नम्बर क्षेत्रीय ब्युरोद्वारा सञ्चालित यस अभियानमा स्थानीयको उल्लेखनीय सहभागिता रहेको दाबी गरिएको छ।

संसदीय व्यवस्था जनहितमा छैन: सह-संयोजक उज्ज्वल
मुसिकोटमा आयोजित कार्यक्रमलाई सम्बोधन गर्दै अभियानका सह–संयोजक उज्ज्वलले वर्तमान संसदीय व्यवस्था जनताका लागि 'अभिशाप' सावित भएको टिप्पणी गर्नुभयो। उहाँले राज्यको ढुकुटीबाट अनावश्यक खर्च गरी करको दुरुपयोग भइरहेको बताउँदै चुनाव हारेका व्यक्तिहरू समेत मन्त्री बन्ने प्रवृत्तिले यो व्यवस्थाको धज्जी उडाएको आरोप लगाउनुभयो।

उज्ज्वलले वर्तमान मतदान प्रक्रियाले आम नागरिकको जीवनमा कुनै परिवर्तन नल्याउने दाबी गर्दै निर्वाचनमा सहभागी नहुन सर्वसाधारणलाई आह्वान गर्नुभयो।

'देशलाई युक्रेन बनाउने खेल भइरहेको छ': मोतिराम खड्का

त्यस्तै, अभियानका संयोजक एवं पार्टी केन्द्रीय सदस्य मोतिराम खड्काले वर्तमान सरकारले वैदेशिक शक्तिको स्वार्थ पूरा गर्न निर्वाचनको नाटक मञ्चन गरेको आरोप लगाउनुभयो। उहाँले भन्नुभयो, "दलाल सरकारले अमेरिकी र भारतीय स्वार्थ अनुकूलको सत्ता टिकाउन यो निर्वाचन गराउँदैछ। यसले देशलाई युक्रेनजस्तै द्वन्द्वको भुमरीमा धकेल्ने 'लिगल लाइसेन्स' खोजिरहेको छ।" नेता खड्काले देशको सार्वभौमिकता जोगाउनका लागि पनि मतदान प्रक्रियाबाट टाढा रहनुपर्नेमा जोड दिनुभयो।

प्रहरी हस्तक्षेपको विरोध
कार्यक्रमका क्रममा प्रहरी प्रशासनले अवरोध सिर्जना गरेको पार्टीले जनाएको छ। पश्चिम रुकुमको मुसिकोटमा कार्यक्रम समापन हुनुअघि नै ठूलो सङ्ख्यामा परिचालित प्रहरीले पार्टीका ब्यानर, झण्डा र अन्य प्रचार सामग्री नियन्त्रणमा लिएको बताइएको छ।  लोकतान्त्रिक हक अधिकारमाथि प्रहरीले हस्तक्षेप गरेको पार्टीको ठहर छ।

गाउँ–गाउँसम्म विस्तार गरिने
हिजो सल्यानबाट सुरु भएको यो बहिष्कार अभियान अब पूर्ण रूपमा फिल्डमा केन्द्रित भएको पार्टीले जनाएको छ। वर्तमान निर्वाचन प्रणालीको विकल्पमा ‘स्वाधीन, संयुक्त सरकार’ गठन हुनुपर्ने माग राख्दै क्रान्तिकारी कम्युनिष्ट पार्टीले यस अभियानलाई दुवै जिल्लाका गाउँ–गाउँसम्म विस्तार गर्ने उद्घोष गरेको छ।