काठमाडौँ
सडक डिभिजन काठमाडौँले उपत्यकाका मुख्य सडकहरूमा ट्राफिक चिह्न तथा सडक रङरोगन (रोड मार्किङ) को कामलाई तीव्रता दिएको छ। डिभिजनले चालु आर्थिक वर्षभित्र पुस मसान्तसम्म काठमाडौँका ‘कोर एरिया’ का करिब ३०० किलोमिटर सडकमा रोड मार्किङ सम्पन्न गर्ने लक्ष्य लिएको छ।

सडक डिभिजन काठमाडौँका प्रमुख सुवोध देवकोटाका अनुसार यस वर्ष सडक रङरोगन तथा मार्किङका लागि ३ करोड रुपैयाँ बराबरको ठेक्का लगाइएको छ। विगतका वर्षहरूमा आर्थिक वर्षको अन्त्यमा हतारमा काम हुने गुनासो आउने गरेको भए पनि यसपटक हिउँदको सुरुवातमै काम थालिएको उनले बताए।

हाल काठमाडौँका विभिन्न सडकहरूमा जेब्रा क्रसिङ, सेन्टर लाइन तथा लेन छुट्याउन पहेँलो रङ (येल्लो मार्किङ) लगाउने काम भइरहेको छ। साथै, रातिको समयमा सवारी चालकलाई सहजता होस् भन्ने उद्देश्यले फुटपाथको किनारामा कालो र सेतो रङ लगाउने कार्य पनि भइरहेको छ।

“लामो समयसम्म हुन नसकेको काम हामीले यसपटक समयमै सुरु गरेका छौँ,” देवकोटाले भने, “अहिले भइरहेको सबै काम पुस मसान्तसम्म पूर्ण रूपमा सम्पन्न गर्नेछौँ।”

यसैबीच, सडक डिभिजन काठमाडौँले यात्रु र सवारी चालकको सुविधाका लागि मुख्य चोकहरूमा ‘इन्फर्मेसन बोर्ड’ (सूचना पाटी) राख्ने तयारी पनि थालेको छ। गौशाला, बानेश्वरलगायत प्रमुख चोकहरूमा विमानस्थल वा अन्य गन्तव्यसम्मको दूरी र दिशासूचक जानकारी दिने बोर्डहरू राखिनेछन्।

यसका लागि आवश्यक बजेट व्यवस्थापन र डिजाइनको काम भइरहेको र छिट्टै विस्तृत योजना सार्वजनिक गरिने प्रमुख देवकोटाले जानकारी दिए।