मुग्लिन–पोखरा खण्डअन्तर्गत पृथ्वी राजमार्गको सबैभन्दा लामो आर्क डिजाइनको मादी पुल निर्माण तीव्र गतिमा भइरहेको छ। पुलमा दैनिक १३० जना कामदार परिचालित छन्।

व्यापारी र यातायातका साथै पर्यटकलाई आकर्षित गर्ने उद्देश्यले कलात्मक डिजाइनमा निर्माण भइरहेको उक्त चार लेनको पुल ३१५ मिटर लामो छ र हाल ७४ प्रतिशत भौतिक प्रगति भएको आयोजना कार्यालयले जनाएको छ। सम्झौताअनुसार समयमै काम पूरा नभएपछि ११ महिना म्याद थप गरिएको थियो।

पुलमा ढलान गर्नुअघि फर्मा लगाउने, डण्डी तान्ने र टेका लगाउने काम भइरहेको छ। पुलमा छ वटा स्पान हुनेछ। निर्माण कम्पनीले विसं २०७९ साउन २६ गते रु १ अर्ब २१ करोडमा ठेक्का सम्झौता गरेको थियो र तीन वर्षभित्र सम्पन्न गर्ने लक्ष्य राखिएको छ।

मुग्लिन–पोखरा सडक आयोजनाको पूर्वी खण्डमा आँबुखैरेनीदेखि जामुनेसम्म १३ वटा पुल निर्माण भइसकेका छन् भने ४१.४५ किलोमिटर कालोपत्र सम्पन्न भइसकेको छ।