चितवन — चितवनको सौराहामा यही पुस ११ देखि १३ गतेसम्म १९औँ चितवन हात्ती तथा पर्यटन महोत्सव–२०८२ आयोजना हुने भएको छ।

क्षेत्रीय होटल सङ्घ नेपाल, चितवनको आयोजनामा तथा युनाइटेड हात्ती सञ्चालन सहकारी संस्था लिमिटेडको मुख्य सह–आयोजनामा र रत्ननगर नगरपालिकाको संरक्षकत्वमा महोत्सव आयोजना गर्न लागिएको हो। आज सौराहामा आयोजित पत्रकार सम्मेलनमार्फत महोत्सवबारे जानकारी दिइएको हो।

आयोजकका अनुसार विश्व सम्पदामा सूचीकृत चितवन राष्ट्रिय निकुञ्ज र सौराहा क्षेत्रको पर्यटन प्रवर्द्धन, मानव र वन्यजन्तुबीचको सहअस्तित्व, संरक्षण चेतना अभिवृद्धि तथा दिगो पर्यटन विकास महोत्सवको प्रमुख उद्देश्य रहेको छ।

सन् १९९७ देखि निरन्तर आयोजना हुँदै आएको यस महोत्सवले चितवनलाई राष्ट्रिय तथा अन्तर्राष्ट्रिय पर्यटन गन्तव्यका रूपमा स्थापित गर्न महत्वपूर्ण योगदान पुर्‍याउँदै आएको बताइएको छ। नेपाल पर्यटन बोर्डका वरिष्ठ निर्देशक हिक्मत सिंह ऐरले बोर्डले चितवनको पर्यटन प्रवर्द्धनका लागि महोत्सवसँग निरन्तर सहकार्य गर्दै आएको उल्लेख गरे।

उनले भने, ‘चितवनलाई राष्ट्रिय तथा अन्तर्राष्ट्रिय रूपमा चिनाउन तथा आन्तरिक पर्यटन प्रवर्द्धन र गन्तव्य ब्रान्डिङका लागि हात्ती महोत्सव प्रभावकारी बन्दै आएको छ। यसले नेपालको पर्यटन उद्योगलाई उचाइमा पुर्‍याउन महत्वपूर्ण भूमिका खेल्नेछ।’

महोत्सवमा हात्तीको पूर्ण सुरक्षा सुनिश्चित गर्दै अन्तर्राष्ट्रिय मापदण्डअनुसार कार्यक्रम सञ्चालन गरिने आयोजकले स्पष्ट पारेका छन्। हात्तीमाथि कुनै पनि किसिमको दुव्र्यवहार निषेध गरिएको छ भने पशु चिकित्सकको नियमित निगरानी, तालिमप्राप्त माहुतेको मात्र सहभागिता र स्वास्थ्य परीक्षण अनिवार्य गरिएको छ। सबै गतिविधि प्रतिस्पर्धाभन्दा पनि मानव–हात्तीबीचको सौहार्द, संस्कृति र परम्पराको प्रवर्द्धनमा केन्द्रित रहने जनाइएको छ।

महोत्सव अवधिभर करिब ८० वटा हात्तीको सहभागिता रहनेछ। हात्ती शोभायात्रा, सांस्कृतिक झाँकी, हात्ती सजावट प्रदर्शन, हात्ती भोजन कार्यक्रम, हात्ती स्वास्थ्य शिविर, हात्तीमैत्री खेल, स्थानीय खेलकुद प्रतियोगिता, सफारी पर्यटन प्रवर्द्धन कार्यक्रम तथा मानव–वन्यजन्तु सहअस्तित्वसम्बन्धी अन्तरक्रिया कार्यक्रम महोत्सवका प्रमुख आकर्षण रहनेछन्।

यसका साथै स्थानीय कला, संस्कृति, भाषा र परम्पराको संरक्षण तथा प्रवर्द्धन, महिला उद्यमी र स्थानीय कृषि उत्पादनको बजारीकरणमा समेत महोत्सवले योगदान पुर्‍याउने विश्वास आयोजकले व्यक्त गरेका छन्।

महोत्सवको अवसरमा पुस ११ देखि १३ गतेसम्म सौराहाका होटल तथा रेस्टुराँहरूमा खाना र आवासमा १० प्रतिशतसम्म छुटको व्यवस्था गरिएको छ। महोत्सवका कारण प्रत्येक वर्ष २५ देखि ३० प्रतिशतसम्म पर्यटक आगमन वृद्धि हुँदै आएको आयोजकको दाबी छ।