सुशीला कार्की नेतृत्वको अन्तरिम सरकारका मन्त्री कुलमान घिसिङले आगामी सरकारले देशको नेतृत्व गर्न आफू तयार रहेको बताएका छन्। रामेछापको सुनापति गाउँपालिकामा आयोजित आधारभूत अस्पताल उद्घाटन कार्यक्रममा बोल्दै ऊर्जासहित तीन मन्त्रालय सम्हालिरहेका घिसिङले उज्यालो नेपाल पार्टी दर्ता गरेको र त्यसको पक्षमा सहयोग गर्न अपील गरे।

उनले देशलाई उज्यालो बनाउने जिम्मेवारी आफूले लिनुपर्ने दाबी गर्दै आफ्नो पार्टीको समर्थनमा भोट मागे। घिसिङले भने, “परिवर्तनलाई संस्थागत गर्न चुनाव जरुरी छ र त्यसका लागि योग्य व्यक्तिहरू चुनिनुपर्छ। आगामी दिनमा देशको नेतृत्व गर्न मलाई आवश्यक देखिन्छ। सम्पूर्ण क्षेत्रलाई उज्यालो बनाउन देशको नेतृत्व गर्न तपाईंहरूको साथ आवश्यक छ।”

घिसिङले सरकारी कर्मचारीको रुपमा गरेको कामको अनुभवलाई अब देशको नेतृत्वमा प्रयोग गर्नुपर्ने बताए। तर, उनको पालिकास्थरीय प्रचार अभियानमा सरकारी साधन स्रोतको दुरुपयोग गरी आफ्नो पार्टीको पक्षमा भोट मागेको आरोपसमेत लाग्दैछ।

उक्त कार्यक्रममा घिसिङले देशभर बिजुली, रोजगारी, सुशासन र नागरिक हितका लागि योग्य नेतृत्व चयन गर्न अपील गर्दै उज्यालो नेपाल पार्टीको प्रचारसमेत गरे।