काठमाडौं, २९ मंसिर — रुकुमपूर्व र उदयपुरबाट प्रहरीले भरुवा बन्दुकसहित पाँच जनालाई पक्राउ गरेको छ।

रुकुमपूर्वको पुथा उत्तरगंगा गाउँपालिका–८ बाट प्रहरीले आइतबार राति तीन जनालाई नियन्त्रणमा लिएको छ। उनीहरूका नाम शेरबहादुर थापा (३०), यमप्रसाद पुन (४३) र कृष्णबहादुर मल्ल (४८) रहेका छन्। प्रहरीले शेरबहादुरको गोठ खान तलासी गर्दा दुई थान भरुवा बन्दुक र सोही बन्दुकमा प्रयोग हुने बारूद फेला पारी उनीहरूलाई पक्राउ गरेको जनाएको छ।

त्यस्तै, उदयपुरको कटारी नगरपालिका–१२ अर्नाबाट पनि आइतबार साँझ दुई जनालाई भरुवा बन्दुकसहित नियन्त्रणमा लिएको छ। पक्राउ पर्नेहरूमा मित्रबहादुर बुढाथोकी (३५) र हिरालाल तामाङ (४४) रहेका छन्। प्रहरीले मित्रबहादुरको बारीमा लुकाइएका बन्दुक फेला पारी दुवै जनालाई नियन्त्रणमा लिएको र आवश्यक अनुसन्धान अघि बढाइएको जनाएको छ।

प्रहरीका अनुसार यस घटनामा सम्बन्धित व्यक्तिहरूको थप पृष्ठभूमि र बन्दुक प्रयोगको उद्देश्यबारे अनुसन्धान जारी छ।