काठमाडौँ । काठमाडौँ महानगरपालिकाका प्रमुख बालेन्द्र (बालेन) शाहले महानगरले करिब दुई खर्ब रुपैयाँ मूल्य बराबरको १ हजार ८ सय ५९ रोपनी सार्वजनिक जग्गा अतिक्रमणमुक्त गराउने लक्ष्य राखेको बताएका छन्।

सोमबार टुँडिखेलमा आयोजित महानगर दिवस समारोहलाई सम्बोधन गर्दै मेयर शाहले आफूहरू निर्वाचित भएर आएयता २३ अर्ब रुपैयाँ मूल्य बराबरको २ सय ८ रोपनीभन्दा बढी सार्वजनिक जग्गा फिर्ता ल्याइसकेको जानकारी दिए। बाँकी सार्वजनिक जग्गा संरक्षण र फिर्ता ल्याउने कार्यमा सबैको साथ र सहयोग आवश्यक रहेको उनले बताए।

उनका अनुसार गएको वर्ष महानगरले करिब २ अर्ब ८६ करोड रुपैयाँ बराबरका पूर्वाधार योजना सम्पन्न गरेको छ। धुलोरहित सहर अभियानअन्तर्गत ५५ वटा सडक सुधार गरिएको र ६२ वटा चोकमा हाई मास्ट लाइट जडान गरिएको छ।

सडक बत्तीको गुणस्तर सुधार र रात्रीकालीन शहरी सौन्दर्य अभिवृद्धिका लागि ५ हजार ३ सय १८ वटा पोलमा १३ हजार ३ सय ४० वटा बत्ती जडान गरेर सहर उज्यालो बनाउने काम भइरहेको मेयर शाहले जानकारी दिए।

त्यसैगरी, करिब ९१ करोड रुपैयाँ लागतमा सम्पदा संरक्षणसम्बन्धी काम गरिएको उनले बताए। यसअन्तर्गत २७६ वटा मूर्त सम्पदासम्बन्धी आयोजना र १२५ वटा अमूर्त सम्पदासम्बन्धी कार्यक्रम सञ्चालन भएका छन्।

महानगरले १ हजार ८६ जना विपन्न नागरिकलाई उपचारका लागि सिफारिस गरेको र २१० जनालाई निःशुल्क उपचार सेवा उपलब्ध गराएको पनि उनले बताए।

मेयर शाहले महानगरले चालु खर्च घटाएर पुँजीगत खर्च बढाउने नीति अपनाएको उल्लेख गर्दै वातावरण सुधार, धुलोरहित सडक, फोहोर व्यवस्थापन तथा व्यवस्थित र उज्यालो सहर निर्माणलाई प्राथमिकतामा राखेर काम भइरहेको बताए।