काठमाडौं, २५ मंसिर । पूर्वगृहमन्त्री रमेश लेखकले गत भदौ २३ गते जेनजी आन्दोलनका क्रममा भएको गोलीकाण्डको जिम्मेवारी आफ्नो नभएको दाबी गरेका छन्। प्रदर्शन दमनका आरोप लागेर दायर गरिएको रिट निवेदनको लिखित जवाफमा उनले ‘विषम परिस्थिति सिर्जना भई हिंसात्मक गतिविधि बढेपछि घटना भएको’ बताउँदै आफूले कुनै भूमिका नखेलेको उल्लेख गरेका छन्।

२१ जनाको ज्यान जानेगरी भएको उक्त घटनाबारे लेखकले भनेका छन्, “गृहमन्त्री पदमा बहाल रहँदासम्म जिम्मेवारी पूरा गरिरहेको अवस्थामा हिंसात्मक गतिविधि बढेको हो, त्यसमा मेरो भूमिका छैन, रिट खारेज गरियोस्।”

उनले जेनजी युवा समूहले शान्तिपूर्ण प्रदर्शन हुने बताएका बेला घुसपैठ हुँदा संसद् भवन क्षेत्रमा उग्र प्रदर्शन भएको र त्यही कारण ‘दु:खदायी र अकल्पनीय घटना’ घटेको दाबी गरेका छन्।

आफूलाई घटनाले अत्यन्त पीडा भएको उल्लेख गर्दै उनले त्यही दिन नैतिकताको आधारमा राजीनामा दिएको जिकिर गरेका छन्। त्यसैले भदौ २४ गतेको घटनामा पनि आफूलाई प्रश्न गर्न नपाइने उनको भनाइ छ।

लेखकले भदौ २२ गते सुरक्षा निकायका प्रमुखसँगको बैठकमा ‘हताहती हुन नदिन र न्यूनतम बल प्रयोग’ गर्न निर्देशन दिएको दाबी पनि गरेका छन्।

प्रतिनिधिसभा विघटन र तत्कालीन प्रधानमन्त्री सुशीला कार्कीको पदमुक्तिको विषयमा उनले तटस्थ रहेको उल्लेख गर्दै उक्त मुद्दा अदालतकै अधिकारक्षेत्रमा पर्ने बताएका छन्।