देशका विभिन्न स्थानमा भएका छुट्टाछुट्टै सवारी दुर्घटनामा पछिल्लो २४ घण्टाभित्र ६ जनाको ज्यान गएको छ। गए राति र आज बिहान भएका दुर्घटनामा मोरङ, सप्तरी, रूपन्देही, सिराहा र बैतडीका व्यक्तिहरूको मृत्यु भएको प्रहरीले जनाएको छ।

उदयपुरको बेलका नगरपालिका–६ बुद्धचोकमा मोटरसाइकल अनियन्त्रित भई दुर्घटना हुँदा चालक २१ वर्षीय सरोज तामाङको विराट टिचिङ अस्पतालमा उपचारका क्रममा मृत्यु भयो।

सप्तरीको कञ्चनरूप नगरपालिका–२ बरमझियामा बस र ट्रक एकआपसमा ठोक्किँदा अन्दाजी ५० वर्षीय एक पुरुषको मृत्यु भएको छ। दुर्घटनामा घाइते ८ जनाको उपचार धर्मेश्वर अस्पताल ठेलिया तथा विराटनगर प्राइम अस्पतालमा भइरहेको छ। बस चालकलाई प्रहरीले नियन्त्रणमा लिएको छ भने फरार ट्रक चालकको खोजी जारी छ।

रूपन्देहीको देवदह–७ सित्तलनगरमा बोलेरोले मोटरसाइकललाई ठक्कर दिँदा ३५ वर्षीय किसन परियारको मृत्यु भएको छ। दुर्घटनामा घाइते दुई जनाको उपचार भैरहवास्थित देवदह मेडिकल कलेजमा भइरहेको छ। बोलेरो चालक प्रहरी नियन्त्रणमा छन्।

लुम्बिनी साँस्कृतिक नगरपालिका–१२ बन्जरहीमा मोटरसाइकल अनियन्त्रित भई दुर्घटना हुँदा २० वर्षीय सुरज लोधको भीम अस्पतालमा उपचारका क्रममा मृत्यु भएको छ।

सिराहाको गोलबजार–१० धर्मपुर टोलमा मोटरसाइकल अनियन्त्रित भएर दुर्घटना हुँदा चालक २५ वर्षीय दिपेश थापाको घटनास्थलमै मृत्यु भएको छ।

बैतडीको सुर्नया–५ कठेगौडामा मिनी ट्रक सुर्नया नदीमा खस्दा चालक २९ वर्षीय नरेश महराको घटनास्थलमै ज्यान गएको छ।

सभी घटनाबारे प्रहरीले आवश्यक अनुसन्धान जारी रहेको जनाएको छ।