हुम्ला, २ पुस — हुम्लाको सर्केगाड गाउँपालिका–४ सर्केगाड बजारमा आज बिहान भिरबाट खसेको ढुंगाले घरभित्र रहेका चार जना घाइते भएका छन्।

दुर्घटनामा घाइते हुनेमा दनबहादुर रावतको घरमा भाडामा बस्ने २८ वर्षीया सरिता विक, २१ वर्षीया लालसरा विक, लालसराकी ६ वर्षीया छोरी रेविका र सर्केगाड–८ की प्रवीणा विक रहेका छन्।

जिल्ला प्रहरी कार्यालय हुम्लाका सूचना अधिकारी शंकर खड्काका अनुसार, सरिताको दाहिने गाला र हातमा चोट लागेको छ र उनलाई थप उपचारका लागि जिल्ला अस्पताल हुम्लामा पठाइएको छ। लालसराको टाउको, उनका छोरीको निधार र प्रवीणाको टाउकोमा चोट लागेको छ भने उनीहरूको सामान्य उपचार पछि घर फर्काइएको छ।

स्थानीयका अनुसार, सर्केगाड बजारमाथि रहेको भिरालो वनबाट ढुंगा खस्ने जोखिम पहिलेदेखि नै कायम छ। प्रकाश शाही नामक स्थानीयले यस अघि पनि सो स्थानमा ढुंगा खसेको बताएका छन्।

प्रहरी र स्थानीयले आगाह गर्दै, बस्तीमाथि पर्ने ढुंगाको जोखिम व्यवस्थापन गर्न आवश्यक कदम चाल्नुपर्ने बताएका छन्।