व्यवसायी देवीप्रकाश भट्टचन हाजिर जमानीमा रिहा, स्वास्थ्य कारण देखाउँदै अदालतको आदेश
काठमाडौँ । व्यवसायी देवीप्रकाश भट्टचनलाई हाजिर जमानीमा रिहा गरिएको छ । स्वास्थ्य अवस्थाका कारण उनलाई हाजिर जमानीमा रिहा गरिएको जिल्ला सरकारी वकिल कार्यालय काठमाडौँका सहन्यायाधिवक्ता रामहरि काफ्लेले रातोपाटीलाई बताए ।
प्रभु ग्रुपका अध्यक्ष समेत रहेका भट्टचनलाई केन्द्रीय अनुसन्धान ब्युरोले कात्तिक ११ मा ललितपुरबाट पक्राउ गरेको थियो ।
भट्टचन विघटित प्रतिनिधिसभामा नेकपा (एमाले) बाट सांसद थिए । प्रभु रेमिटको रकम हिनामिना गरेको कसुरमा उनलाई पक्राउ गरिएको प्रहरी अधिकृतहरू बताउँछन् ।
सरकारी वकिल कार्यालयको निर्णय अनुसार उनी थुनामुक्त भएका छन् । कसुरको प्रकृति हेर्दा उनलाई थुनामै राखेर अनुसन्धान गर्नुपर्ने अवस्था नदेखिएको काफ्लेले बताए ।
