काठमाडौँ, २७ कात्तिक । नवनियुक्त प्रहरी महानिरीक्षक (आईजीपी) दानबहादुर कार्कीले आज गृह मन्त्रालयमा आयोजित कार्यक्रममा दर्ज्यानी चिह्न लगाएका छन्।

सचिव रामेश्वर दंगालले कार्कीलाई नेपाल प्रहरीको सर्वोच्च पद आईजीपीको दर्ज्यानी चिह्न प्रदान गरेका हुन्। प्रहरी नियमावलीअनुसार ३० वर्षे सेवा अवधिका कारण पूर्व आईजीपी चन्द्रकुवेर खापुङ २६ कात्तिक राति १२ बजे अनिवार्य अवकाशमा गएका थिए, जसपछि कार्की मातहत नेपाल प्रहरीको कमाण्ड आए। कार्कीलाई आईजीपीमा नियुक्त गर्ने मन्त्रिपरिषद्को निर्णय कात्तिक २५ गते भएको थियो।

यसअघि उनले २४ भदौमा जेनजी आन्दोलनका क्रममा उपत्यकाको कमाण्ड सम्हालेका थिए भने २३ भदौमा उपत्यका कमाण्ड एआईजीविहीन थियो। कार्की प्रहरी प्रधान कार्यालयस्थित मानव स्रोत विभागका प्रमुख, डीआईजी हुँदा लुम्बिनी प्रदेशको कमाण्ड, र एसएसपीको रूपमा काठमाडौं जिल्ला प्रहरी परिसरको कमाण्डसमेत सम्हालेका थिए। काठमाडौं जिल्ला र उपत्यकाको चुनौतीपूर्ण कमाण्ड सम्हालेका कार्की इमान्दार प्रहरी अधिकृतको रूपमा परिचित छन् र कुनै ठूलो आर्थिक विवादमा नमुछिएका छन्। विदेशमा विभिन्न तालिम लिएका उनले नेपाल प्रहरीको केन्द्रीय प्रवक्ता समेत रहिसकेका छन्।