काठमाडौँ, कात्तिक १५ – पार्टी एकताको तयारीमा जुटेको नेकपा (माओवादी केन्द्र) ले आज दिउँसो महाधिवेशन आयोजक समितिको सचिवालय बैठक बोलाएको छ। बैठक आज दिउँसो ३ बजे पार्टी केन्द्रीय कार्यालय, पेरिसडाँडामा बस्ने भएको हो।

माओवादी केन्द्रका नेता देवेन्द्र पौडेलका अनुसार बैठकमा नेकपा (एकीकृत समाजवादी), नेपाल समाजवादी पार्टी लगायतका दलहरूसँग पार्टी एकता, पदीय व्यवस्थापन, मोडालिटी (एकताको स्वरूप र प्रक्रिया) लगायतका विषयमा विस्तृत छलफल हुनेछ।

यसअघि, शुक्रबार सम्पन्न एकीकृत समाजवादीको केन्द्रीय समिति बैठकले माओवादी केन्द्रसँग पार्टी एकता गर्ने निर्णय गरेको थियो। उक्त निर्णयपछि माओवादी केन्द्रले आजको बैठक बोलाएको हो।

पार्टी स्रोतका अनुसार बैठकमा एकता समितिको गठन, साझा नीति–कार्यक्रम र नेतृत्व संरचनाबारे पनि प्रारम्भिक मस्यौदा तयार पार्ने सम्भावना छ।