सल्यान जिल्लाको राजनीतिक वृत्तमा अहिले क्रान्तिकारी कम्युनिस्ट पार्टीको सक्रियताले चुलिदै गएको छ ।  पार्टीले जिल्लामा व्याप्त सुशासनको अभाव, संस्थागत भ्रष्टाचार, बेथिति र कुशासनविरुद्ध विशाल र्‍याली तथा सभाको आयोजना गर्दै आफ्नो जनआधार र गतिविधिलाई प्रभावकारी रूपमा अगाडि बढाएको छ। यस प्रकारका प्रदर्शनले जनसमस्या उजागर गर्दै सरकारलाई खबरदारी गर्ने पार्टीको अभियानलाई थप बल पुर्‍याएको छ।  

पार्टीले जिल्लाका विभिन्न स्थानमा आफ्नो संघर्षका कार्यक्रम तिब्र पारेको छ। यसै क्रममा गत मङ्सिर ७ गते कपुरकोटमा आयोजित भव्य र्‍याली ले सरकारलाई भ्रष्टाचार र बेथितिको अन्त्यका लागि कडा चेतावनी दिएको छ। सयौंको संख्यामा भेला भएका सहभागीहरूले जोशपूर्ण रूपमा ‘कठपुतली सरकार मुर्दाबाद!’, ‘स्वाधीन सरकार गठन गर!’, ‘अमेरिकी साम्राज्यवाद मुर्दाबाद!’ र ‘भारतीय साम्राज्यवाद मुर्दाबाद!’ जस्ता सशक्त नाराहरू लगाएका थिए। पार्टीका केन्द्रीय सदस्य मोतिराम खड्का ले प्रमुख रूपमा नाराहरूको अगुवाइ गर्नुभएको थियो।

कपुरकोटको सभालाई सम्बोधन गर्दै जिल्ला सेक्रेटरी उज्जवल ले वर्तमान सरकार जनताका मुद्दामा गैरजिम्मेवार बनेको, भ्रष्टाचारले सीमा नाघेको, NGO,INGO बाट संचालित भएको आरोप लगाउनुभयो। उहाँले पार्टीले जनताका हकहित र राष्ट्रिय स्वाधीनताका लागि आफ्नो संघर्षलाई अझ कडा बनाउँदै लैजाने प्रतिबद्धता व्यक्त गर्नुभयो। क्रान्तिकारी कम्युनिस्ट पार्टी सल्यानले जिल्लामा संघर्षका कार्यक्रमहरूलाई तिब्रता दिइरहेको छ।  

क्रान्तिकारी कम्युनिस्ट पार्टीले यस बृहत् प्रदर्शनमार्फत जिल्लामा आफ्नो सङ्गठनात्मक उपस्थितिलाई सशक्त रूपमा प्रस्तुत गरेको छ। भ्रष्टाचार, बेथिति र कुशासनका विरुद्ध पार्टीले अझ कडा संघर्ष गर्ने चेतावनी दिएको छ। पार्टीले अबका दिनमा जिल्लाका अन्य क्षेत्रमा पनि आफ्नो अभियान विस्तार गर्दै जनतालाई परिवर्तनको पक्षमा गोलबद्ध गर्ने रणनीति लिएको देखिएको छ, जसले सल्यानको राजनीतिमा नयाँ तरङ्ग ल्याउन सक्ने सम्भावना बढेको छ।