काठमाडौँ – सरकारले नेपालसँग भएको दोहोरो करमुक्ति सम्झौता (डीटीएए) भएका सात देशलाई नेपाली कर कानुनमा आएको परिवर्तनबारे औपचारिक जानकारी गराएको छ।

आन्तरिक राजश्व विभागका अनुसार, आयकर ऐन २०५६ को दफा ७३ को उपदफा ५ अनुसार नर्वे, थाइल्याण्ड, श्रीलङ्का, अस्ट्रिया, पाकिस्तान, चीन र दक्षिण कोरिया सरकारलाई कानुन परिवर्तनबारे जानकारी पठाइएको छ।

नेपालले हालसम्म ११ देशसँग दोहोरो करमुक्ति सम्झौता गरेको छ। तर, नयाँ आयकर ऐन २०५८ अघि सम्झौता भएका बङ्गलादेश, भारत र कतारलाई अझै जानकारी पठाइएको छैन। मौरिसससँगको सम्झौता सरकारले अन्त्य गरेकोले त्यहाँ पनि जानकारी दिइएको छैन।

दोहोरो करमुक्ति सम्झौताअनुसार, कुनै व्यक्तिले आम्दानी गर्ने देशमा कर तिरेको खण्डमा अर्को देशमा त्यही आम्दानीमा पुनः कर तिर्नु पर्दैन। यदि आम्दानी हुने देशको कर दर कम छ भने, कम भएको रकम मात्रै अर्को देशमा तिर्नुपर्छ।