काठमाडौँ । जनता समाजवादी पार्टी (जसपा) नेपालले आगामी कात्तिक १९ र २० गते काठमाडौँमा आफ्नो केन्द्रीय समितिको बैठक बोलाएको छ।

पार्टीका प्रचार प्रसार तथा प्रकाशन विभाग प्रमुख पूर्ण बस्नेतका अनुसार, बैठकमा वर्तमान राजनीतिक परिस्थिति, सङ्गठनात्मक कार्ययोजना, आगामी निर्वाचन तयारी तथा अन्य महत्वपूर्ण विषयहरू छलफलका लागि एजेण्डामा राखिएको छ।

बस्नेतले भने, “बैठकले पार्टीको आगामी रणनीति निर्धारण गर्नेछ र सदस्य तथा कार्यकर्तासँग संवाद गरी पार्टीको गतिविधि प्रभावकारी बनाउन महत्वपूर्ण भूमिका खेल्नेछ।”

पार्टीभित्रको एकता, संगठन सुदृढीकरण र आगामी निर्वाचनमा तयारी सुनिश्चित गर्न यस बैठकलाई विशेष महत्व दिइएको छ। बैठकमा पार्टीका वरिष्ठ नेताहरू, जिल्ला तथा प्रदेश तहका प्रतिनिधि सहभागी हुने जनाइएको छ।

यस बैठकबाट जनता समाजवादी पार्टीले राजनीतिक कार्ययोजना स्पष्ट गर्दै आगामी कदमहरूलाई सार्वजनिक गर्ने अपेक्षा गरिएको छ।