काठमाडौँ, कात्तिक ९  — सिंहदरबार परिसरमा निर्माण भइरहेको नयाँ संसद भवन आगामी पुस महिनासम्म तयार नहुने सम्भावना देखिएसँगै संघीय संसद सचिवालयले वैकल्पिक रूपमा प्रतिनिधिसभा अन्तर्गतको कृषि सहकारी तथा प्राकृतिक स्रोत समितिको हलबाट राष्ट्रियसभा सञ्चालनको पूर्वतयारी थालेको छ।

नयाँ बानेश्वरस्थित संसद भवन जेनजी आन्दोलनका क्रममा आगजनी भएर ध्वस्त भएपछि राष्ट्रियसभा बैठक सञ्चालनका लागि नयाँ स्थान खोज्ने क्रममा सचिवालय जुटेको हो।

सचिवालयका प्रवक्ता एकराम गिरीका अनुसार राष्ट्रियसभा सञ्चालनका लागि अहिले दुई विकल्प छन्।
उनले भने, “हामीसँग पहिलो विकल्प सिंहदरबार परिसरमै निर्माणाधीन नयाँ संसद भवन हो। तर त्यो भवन पुससम्म तयार नहुने अवस्था आयो भने वैकल्पिक रूपमा कृषि सहकारी तथा प्राकृतिक स्रोत समितिको हल न्यूनतम पूर्वाधारसहित सञ्चालनका लागि तयार पार्ने तयारी भइरहेको छ।”

उनका अनुसार, नयाँ वानेश्वरमा संसद भवन नहुँदासम्म पनि राष्ट्रियसभा बैठक त्यही समितिको हलबाट चलाइएको थियो। अहिले पनि सचिवालयले सम्भावित वैकल्पिक प्रयोगका लागि पूर्वतयारी मात्र थालेको जनाइएको छ।

संविधान अनुसार, राष्ट्रियसभाको एक अधिवेशन अन्त्य भएको छ महिनाभित्र अर्को अधिवेशन बोलाउनुपर्ने कानुनी व्यवस्था छ। अघिल्लो अधिवेशन भदौ ३१ गते स्थगित भएकाले आगामी फागुनभित्र नयाँ अधिवेशन बोलाउनै पर्ने बाध्यता छ।

जेनजी आन्दोलनपछि गत भदौ २७ गते प्रतिनिधिसभा विघटन भई फागुन २१ गतेका लागि नयाँ निर्वाचन तोकिएको छ। त्यसअघि नै ५९ सदस्यीय राष्ट्रियसभाको बैठक बोलाइएमा बैठक सञ्चालनका लागि उचित स्थान आवश्यक पर्ने भएकाले सचिवालयले पूर्वतयारी थालेको हो।

गिरीका अनुसार, पहिलो प्राथमिकता सिंहदरबार परिसरमा निर्माणाधीन नयाँ संसद भवन नै हो, तर निर्माण ढिलाइ भए कृषि समितिको हल बढी व्यावहारिक विकल्प हुने देखिएको छ। साथै, सिंहदरबार परिसरमै रहेको भूकम्पले क्षतिग्रस्त पुरानो प्रतिनिधिसभा भवन पनि सुदृढीकरणको काम भइरहेको उनले जानकारी दिए।

सचिवालयले न्यूनतम खर्चमा युट्युबमा लाइभ गर्न सकिने र जनताले सहज अवलोकन गर्न सक्नेगरी प्राविधिक तथा भौतिक पूर्वाधार कसरी तयार पार्ने भन्नेबारे पनि छलफल थालेको छ।

नयाँ संसद भवन पुस १६ गतेभित्र ठेकेदार कम्पनीले तयार गरेर बुझाउने सम्झौता रहेको छ। उक्त म्यादभित्र भवन हस्तान्तरण भए राष्ट्रियसभा त्यहीँबाट सञ्चालन हुने, अन्यथा अस्थायी रूपमा कृषि समितिको हल प्रयोग गरिने सचिवालयले जनाएको छ।