रौतहट, कात्तिक ९ – रौतहटको फतुवाबिजयपुर–२ सितलपुर निवासी शंकर साहको हत्या भएको १५ दिन बितिसक्दा पनि प्रहरीले हत्यारालाई पक्राउ गर्न नसक्दा मृतक परिवारले न्यायको माग गरेका छन्।

मृतकका छोरा सन्तोष साहले फतुवाबिजयपुर इलाका प्रहरी कार्यालयमाथि हत्यारालाई जोगाउने प्रयास गरेको गम्भीर आरोप लगाएका छन्। उनका अनुसार, हत्यामा स्थानीय हरिदेव राय यादव, कपिलदेव राय यादव, ब्रह्मदेव राय यादव, सरेश राय यादव, अरबिन्दकुमार यादव र रितेशकुमार यादव संलग्न छन्।

“हामीलाई अरु केही होइन, न्याय चाहिएको हो,” साहले भने, “तर प्रहरी प्रमुख स्वयं हत्यारालाई जोगाउने खेलमा लागेका छन्।”

पीडित परिवारले घटनाको निष्पक्ष अनुसन्धान नगरी प्रहरीले हत्याराकै पक्ष लिएको भन्दै पत्रकार र नागरिक समाजसँग न्यायको गुहार मागेका छन्।

यसैबीच, आम जनता पार्टी (आजपा)का अध्यक्ष एवं पूर्वमन्त्री प्रभु साहले यस घटनाप्रति गम्भीर ध्यानाकर्षण गराउँदै दोषीलाई कानूनी दायरामा ल्याउन गृह प्रशासनसँग माग गरेका छन्। उनले प्रहरी अधिकारी सुरेन्द्र यादवमाथि लागेको आरोपको निष्पक्ष छानबिन गरी आवश्यक कारबाही गर्न सरकारलाई आग्रह गरेका छन्।