म्याग्दी । निरन्तर हिमपातका कारण म्याग्दी हुँदै धौलागिरि हिमाल फन्को लगाएर मुस्ताङ जाने धौलागिरि चक्रीय पदमार्गको हिडन भ्यालीमा १५ जना आन्तरिक र विदेशी पर्यटक अलपत्र परेका छन्। तीमध्ये तीन जना बेलायती महिला र १२ जना नेपाली नागरिक रहेका छन्।

म्याग्दीको धवलागिरि गाउँपालिका–४ मुदीस्थित इटाली आधार शिविर हुँदै मुस्ताङको घरपझोङ गाउँपालिका–२ मार्फा जाने क्रममा सोमबार रातिदेखि लगातार परेको हिमपातका कारण पदमार्ग अवरुद्ध भएको हो। हिमपातका कारण पर्यटकहरू धौलागिरि र सिता हिमालबीचको करिब ५ हजार १०० मिटर उचाइमा रहेको हिडन भ्यालीमा रोकिएका छन्।

म्याग्दीका प्रमुख जिल्ला अधिकारी बद्रीप्रसाद तिवारीका अनुसार सबै पर्यटक हालसम्म सुरक्षित छन्। “तीन जना बेलायती महिला र १२ जना नेपाली यात्रुहरू त्यहाँ बास बसेका छन्। उनीहरू सकुशल छन्, तर निरन्तर हिमपातका कारण उद्धार कार्यमा समस्या छ,” तिवारीले बताए।

उक्त पदयात्रामा रहेका बेलायती नागरिक म्यारी रिप्पे, क्यारिराइन विल्सन र इमिल्ली क्याट्स हुन्। उनीहरू काठमाडौंस्थित *सेक्रेट हिमालय ट्रेड एन्ड एक्सपिडिसन* ट्राभल एजेन्सीमार्फत पदयात्रामा गएका थिए। कम्पनीका व्यवस्थापक विनय लामाका अनुसार, हिमपातले बाटो बन्द भएपछि पथप्रदर्शकले स्याटेलाइट फोनमार्फत उद्धारका लागि अनुरोध गरेका छन्।

मंगलवार साँझ एजेन्सीमार्फत हेलिकप्टर उद्धारको पहल गरिएको भए पनि निरन्तर हिमपातका कारण उद्धार सम्भव नभएको बताइएको छ। जिल्ला प्रशासन कार्यालय म्याग्दी र मुस्ताङले सुरक्षा निकायसँग समन्वय गरी उद्धार टोली पठाउने प्रयास गरिरहेका छन्।

त्यहाँ होटल वा बस्ती नभएकाले पर्यटकहरू टेन्टमा बसिरहेका छन्। अधिकारीहरूका अनुसार, हिउँ पर्न रोकिएर मौसम खुल्नेबित्तिकै हवाई वा स्थल मार्गबाट उद्धार कार्य सुरु गरिनेछ।

हाल सो क्षेत्रमा मोबाइल र इन्टरनेट सेवा पहुँच बाहिर रहेको जनाइएको छ।