रौतहटमा नुहाउने क्रममा नदीले बगाउँदा एक बालकको मृत्यु भएको छ। रौतहट राजपुर नगरपालिका- ८ बलुवा गोठ टोल बस्ने गोनवर मियाको १० वर्षीय अरबाज मियाको मृत्यु भएको हो। सोमबार दिउँसो २ बजेतिर लाल बकैया नदीमा नुहाउँदै गर्दा अरवाजलाई बगाएको थियो।

पानीले बगाएर बेपत्ता भएको सूचना आएलगत्तै इलाका प्रहरी कार्यालय राजपुरका प्रहरी बरिष्ठ नायब निरीक्षक राजेन्द्र गिरी र फतुवा बेसबाट सशस्त्र प्रहरी निरीक्षक पूर्णबहादुर तामाङ नेतृत्वको सुरक्षाकर्मी टोली उद्धारका सामाग्री सहित घटनास्थलमा पुगेको थियो ।

खोज तलासको क्रममा दिउँसो २:४० बजे अरबाजलाई बालकलाई फेला पारी उपचारको लागी प्राथमिक स्वास्थ्य केन्द्र राजपुर फरहदवामा लगिएको थियो।

डाक्टरले चेक जाँचपछि मृत घोषित गरेको जिल्ला प्रहरी कार्यालय रौतहटका प्रहरी नायब उपरीक्षक डिएसपी राजु कार्कीले जानकारी दिए।