काठमाडौँ। भदौ २३–२४ गते भएको जेनजी आन्दोलनका क्रममा गृह मन्त्रालय अन्तर्गत ११ जिल्ला प्रशासन कार्यालय र ७ इलाका प्रशासन कार्यालयमा तोडफोड र आगजनीबाट क्षति भएको छ। प्रारम्भिक विवरण अनुसार अहिलेसम्म ३८ करोड ८० लाख ९५ हजार ३९२ रुपैयाँ बराबरको अनुमानित क्षति भएको गृह मन्त्रालयको नीति योजना अनुगमन तथा मूल्यांकन महाशाखाले जनाएको छ।

महाशाखाले संकलन गरेको विवरणअनुसार मोरङ, भक्तपुर, चितवन, कास्की, कञ्चनपुर, तनहुँ, काठमाडौँ, बाँके, कैलाली र सिन्धुलीका जिल्ला प्रशासन कार्यालयमा धेरै क्षति पुगेको छ। इलाका प्रशासन कार्यालयहरू बुटवल, रंगेली, कोहलपुरमा समेत ठूलो क्षति भएको छ।

महाशाखाका अनुसार डोटी जिल्लाको जिल्ला प्रशासन कार्यालय र कास्की, बाराका, कैलालीका इलाका प्रशासन कार्यालयमा सामान्य क्षति भएको छ। कार्यालय सञ्चालनमा कठिनाइ भएकोले केही कार्यालयहरू काम गर्न नसकेको र काठमाडौँ जिल्लाको प्रशासन कार्यालय पुरानो सामान्य प्रशासन मन्त्रालयमा सारेर काम भइरहेको छ।

महाशाखाका प्रमुख सहसचिव सुरेश पन्थीले भने, “प्रारम्भिक विवरण मात्र आएको छ। क्षतिको एकिन रकम र पुनःनिर्माणका लागि आवश्यक थप बजेटको आंकलन केही समयमा मात्र सम्भव हुनेछ।”

यसअघि प्रदर्शनकारीहरूले गृह मन्त्रालयमा समेत तोडफोड र आगजनी गरेका थिए, जसबाट कार्यालयको संरचना ध्वस्त भएको थियो।