काठमाडौँ उपत्यकाका विभिन्न स्थानमा आगामी छठ पर्वका लागि तयारी तीव्र पारिएको छ। खासगरी तराईमा धुमधामका साथ मनाइने यो आस्थाको महापर्व पछिल्ला वर्षहरूमा काठमाडौँ उपत्यकामा पनि व्यापक रूपमा मनाउन थालिएको छ।

छठ पर्व मनाउनका लागि काठमाडौँको कमलपोखरीमा अहिले छठ घाट निर्माणको काम धमाधम भइरहेको छ। पोखरी वरिपरि केराका थम्बा गाड्ने, बत्ती झिलिमिली बनाउने र सजावट गर्ने कार्य तीव्र रूपमा अघि बढाइएको छ।

छठ पर्व सूर्यदेवको आराधना तथा कृतज्ञताको प्रतीकका रूपमा मनाइन्छ। यस पर्वमा भक्तजनले अस्ताउँदो र उदाउँदो सूर्यलाई अर्घ्य दिएर पूजा–अर्चना गर्छन्। भक्तजनका लागि उपत्यकाका कमलपोखरी, गुठीसँग जोडिएका पोखरीहरू, रानीपोखरी, नागपोखरीलगायत स्थानमा पनि विशेष तयारी भइरहेको छ।

स्थानीय संघसंस्था र छठ समिति सदस्यहरूले भक्तजनको सुविधाका लागि सुरक्षा, सरसफाइ र प्रकाशको व्यवस्था मिलाउने कार्य तीव्र रूपमा अघि बढाइरहेको जनाएका छन्।

गत वर्षभन्दा यस वर्ष सहभागी भक्तजनको संख्या अझ बढ्ने अनुमान गरिएको छ। छठ पर्वमा सहभागी हुन काठमाडौं उपत्यकाका साथै बाहिरबाट पनि श्रद्धालुहरू आउने अपेक्षा गरिएको छ।